COMPASSION TANZANIA IMETOA MSAADA WA VISIMA VYA MAJI

SHIRIKA la Compassion Tanzania limeonyesha nia ya kupunguza adha ya upatikanaji wa maji safi hususani nyakati za kiangazi kwa kutoa msaada wa visima vitatu kupitia mradi wa uvunaji wa maji ya mvua uliotolewa kwa ajili ya huduma watoto zaidi ya 280 waliopo mjini Kibaya wilayani Kiteto mkoani Manyara.

Kwa mujibu wa mkurugenzi mkuu wa shirika hilo mchungaji Joseph Mayalla ambalo kwasasa limeweza kutoa huduma ya elimu ya awali,ufundi stadi hadi vyuo vikuu kupitia huduma ya afya kwa mtoto kwa watoto 65,000 waliopo kwenye mikoa 12 nchini amesema msaada huo uliogharimu kiasi cha shilingi milioni 32,licha ya kuwalenga watoto wa mji huo lakini pia utainufaisha jamii ya mji wa Kibaya yalipo makao makuu ya wilaya hiyo.

Aidha mchungaji Mayalla ameongeza kuwa katika kuhakikisha shirika hilo linatoa huduma ya afya lakini pia litahakikisha kuendelea kuwasaidia watoto walio katika mazingira magumu ili kutimiza malengo yake hadi 2020 bila ya kujali itikadi za kidini ili kupunguza umaskini,ujinga na maradhi na kuisaidia serikali kwa wananchi wake.

“lazima tuwe na mkakati tunataka tuwe na kizazi sio cha wanung’unikaji na walalamikaji tunataka tuwe na kizazi chenye kutafuta suluhisho ufumbuzi wa matatizo badala ya kukaa kwenye magenge ya walalamikaji..tunataka kizazi kinachojiuliza tutaifanyia nini Tanzania na sio Tanzania itatufanyia nini hayo ndio malengo yetu ya milenia”

 kwa upande mwingine licha ya kuhimiza familia kubuni hifadhi za maji ya mvua ili kuondokana na magonjwa ya milipuko ameitaka jamii kupanda miti ili kuiunga serikali katika kampeni zake za kupunguza hewa ya ukaa ambayo tayari imeonyesha kuleta madhara makubwa ya uharibifu wa mazingira na mmomonyoko wa ardhi.

Akizindua mradi huo kwa niaba ya mkuu wa wilaya katibu tawala wa wilaya hiyo Fidelisi Kyoro amelipongeza shirika hilo kuunga mkono ilani ya serikali iliyopo madarakani kwa kupunguza adha ya tatizo la maji lililopo katika mji huo yalipo makao makuu ya wilaya hiyo ambalo amesema ni kubwa na linalotakiwa kutafutiwa ufumbuzi.

“tunategemea mabwawa yanayochimbwa kwa kutegemea mabwawa ya DADPS na yale ya asili,tunategemea visima virefu vinavyochimbwa na serikali ama wafadhili tunategemea tatizo kubwa hatuna vyanzo vingi vya maji na mito wilayani kwetu”

Aidha Kyoro alisema kutokana na tatizo hilo kupitia jitihada za serikali kwa kushirikiana na mashirika ya kitaifa kama vile benki ya dunia ambayo imejaribu kuchimba visima 14 lakini kati ya hivyo ni saba tu yaliyoonyesha mwelekeo ya upatikaji wa maji endelevu toka kwenye kina cha futi 200.

“hapa kwa visima vifupi huwezi kuchimba na kupata maji mpaka uchimbe visima kirefu ambacho kinagharimu fedha nyingi hadi milioni 30,hilo ni kazi kubwa lakini kama mnavyofanya sasa watu wetu wanaelimishwa kutafuta mbinu ya kuvuna maji ya mvua ambapo tumeanza sasa”

Hata hivyo kwa upande mwingine baadhi ya wanawake wa mji huo wakishukuru kuwepo kwa visima hivyo amesema utatoa nafasi kwa wananchi kujifunza na kuepukana na magonjwa ya milipuko kama vile kipindupindu yanayosababsihwa na matumizi ya maji ya visima yasiyokuwa salama.

“kero ya maji wilaya ya kiteto ni kubwa saana..hata mradi wa halmashauri wamekuwa wakipandisha gharama kila wakati leo shilingi mia kesho zaidi inamaana kuna kero kubwa ya maji,hata mradi wa maji umekuwa kama wa binafsi kutokana na upandishwaji wa maji kiholela”alisema bi zena ndaro.

Share this: