Ukeketaji Watoto Longido: Wananchi Wapinga Vitendo vya Ukandamizaji

Ukeketaji Watoto Longido: Wananchi Wapinga Vitendo vya Ukandamizaji

Na Woinde Shizza, ARUSHA

Wakati serikali ikiendelea kupiga vita swala la ukeketaji kwa mabinti na watoto wa kike Kwa ujumla kumebainika kuwepo wa matukio ya ukeketaji kwa watoto waliochini ya miaka mitano wilayani Longido mkoa wa Arusha.

Baadhi ya wazazi wa Jamii ya kifugaji katika Wilaya hiyo,wameanza kuwakeketa watoto wakiwa wachanga ili kukwepa kukamatwa na vyombo vya dola.

Wilaya ya Longido, iliyoko mkoani Arusha nchini Tanzania, imekuwa ikikabiliwa na tatizo la ukeketaji wa watoto wa kike kwa muda mrefu lakini pia serikali imekuwa ukitumia nguvu kubwa sana kukomesha tatizo hilo kama sio kulimaliza kabisa

UKEKETAJI NINI?

Ukeketaji, ambao pia hujulikana kama ni mchakato ambao sehemu za kijinsia za wanawake na mabinti hukatwa au kuharibiwa kwa sababu za kitamaduni, kidini au kijamii.

Ukeketaji ni mila potofu na vitendo vya ukatili ambavyo havina msingi wowote wa kiafya na ni kinyume cha haki za binadamu.

Ingawa kuna sheria inayokataza ukeketaji, bado vitendo hivyo vinaendelea katika maeneo mengi, hasa katika jamii za vijijini, Asilimia ya wanawake na mabinti waliokeketwa inatofautiana kulingana na eneo, kabila, na tamaduni za kikabila.

Hivi ni vifaabvinavyotumika kufanyia ukeketaji

KIPI KINACHOPELEKEA UKEKETAJI KUFANYIKA

Mila potofu pamoja na tamaduni ndio zinazopelekea baadhi ya wazazi kuwakeketa watoto wao au mabinti wao japo kuwa kuna baadhi ya wasichana ambao wameelimika na wameamua kuachana na mila hizo potofu lakini bado kuna baadhi yao wanaendeleza mila hizo mbaya zaidi wamekuwa wanawakeketa watoto wadogo ambao hawajitambui

Hata hivyo, wananchi wa Longido wamejitokeza kwa wingi kupinga vitendo hivi vya ukatili na kusimama imara katika kukabiliana na tatizo hili.

Wakizungumza na mwandishi wa habari hizi juu ya kuibuka matukio ya ukeketaji watoto, Wilaya ya Longido mkoa wa Arusha, baadhi ya wazazi na maafisa wa serikali wilaya ya Longido walisema bila hatua kali kuendelea kuchukuliwa ukatili huu dhidi ya watoto hautakoma.

Baadhi ya wakazi wa Wilaya hiyo ambayo asilimia 95 ya wakazi ni wafugaji wa Jamii kimasai wameeleza kuwa kutokana na jitihada na serikali wilaya Longido kudhibiti watoto wakiwa shuleni kufanyiwa ukeketaji baadhi ya wazazi sasa wanakeketa watoto wachanga.

MWANANCHI ALONGA

Paulo Orkediaye mkazi wa Kijiji Cha Oltepesi anasema licha ya elimu kuendelea kutolewa baadhi ya wazazi wanakeketa watoto wachanga kwa Siri.

"Hi tabia ni mbaya Sana tunatoa elimu kupinga ukeketaji lakini baadhi ya wazazi wanaendelea kukeketa mbaya zaidi wanakeketa watoto wadogo ambao awajitambui na awana ueewa" alisema

Neema Nailom mkazi wa Olbomba alisema mkakati wa kukeketa watoto wachanga unafanywa kwa uficho baina ya mama mzazi na baadhi ya Ngariba.

"Huwezi kubaini mapema kwani ni Siri wanafanya sisi tunawabaini watoto pale ambapo wanaumwa na kupelekwa Hospitali"alisema

Baadhi ya Wanawake wa wilayani Longido wanaopiga vita ukeketaji

SHUHUDA WA UKEKETAJI AONGEA

Jane Melei mkazi wa Kimokowa alisema mzazi wake alimkeketa mdogo wake akiwa mdogo kutokana na Mila hiyo kuendelea na kutaka mtoto awe na heshima ya kuolewa.

"Hata Mimi nimekeketwa nikiwa mdogo lakini wazazi walifanya hivi ili niwe na hadhi ya kuolewa maana huku kwetu Kama hujakeketwa ni ngumu kupata mtu wa kukuoa"alisema.

Merkinoi Orkendiaye alisema vitendo vya ukeketaji vimekuwa vikiendelea licha ya madhara ikiwepo kuugua ugonjwa wa festula.

"Mimi nilifanyiwa ukeketaji nikapata festula na Sasa nimekuwa natoa elimu kupinga ukeketaji"alisema

KIONGOZI WA SERIKALI AFUNGUKA

Afisa Maendeleo ya Jamii Wilaya ya Longido, Grace Mghase amesema kuendelea kwa vitendo vya ukeketaji vinachangiwa na vijana kuwa wazito kuoa binti ambaye hajakeketwa.

"Hili Jambo bado linamizizi Sana sisi tunatoa elimu lakini ajabu kuna vijana na wasichana wenye elimu lakini bado wanaunga mkono ukeketaji"alone

Grace alisema hata baadhi ya wanasiasa katika Wilaya hiyo bado wanaogopa Mila hii potofu kuipinga hadharani.

"Ni kweli tunataarifa wanakeketa watoto wachanga ili kukwepa kukamatwa lakini wajuwe serikali ina mkono mrefu tukiwabaini watakamatwa"alisema

MUELIMISHAJI JAMII AFUNGUKA

Mary Laizer muelimisha Jamii kupinga ukeketaji Wilaya ya Longido alisema madhara ya ukeketaji ni makubwa ikiwepo kupoteza maisha.

"Mimi mwenyewe nilifanyiwa ukeketaji wazazi wangu Walikuwa hawajuwi athari zake lakini Sasa wamejua na Mimi nimekuwa natoa elimu kupinga ukeketaji"alisema

hivi Sasa wanahamasisha kuwavusha Rika watoto wa kike bila kuwakeketa lakini pia kutoa elimu kwa vijana kuacha Mila ya kupinga kuoa msichana ambaye hajakeketwa.

ASASI ZISIZO ZA KISERIKALI WANENA

Mkurugenzi wa taasisi ya Ewang'ani Maasai Foundation,Nangidare Laizer alisema changamoto ya ukeketaji ni kubwa lakini wanaendelea kutoa elimu .

"Mimi Kama msichana tunakwenda vijiji tunatoa elimu japo kuna wazazi wanaendelea kukeketa watoto kwa Siri"alisema

Mkurugenzi wa Shirika la TEMBO la Wilaya ya Longido mkoa Arusha, Pauline Sumayani alisema changamoto ya ukeketaji bado ipo lakini shirika lao linajitahidi kutoa elimu kupinga ukeketaji.

"Tunatoa elimu kwa wanawake,vijana na wazee kuacha ukeketaji na tumekuwa tukitoa zawadi kwa wazazi ambao wanawavusha Rika watoto bila kuwakeketa"alisema

NINI KIFANYIKE KUTOKOMEZA UKEKETAJI HUSUSA NI HUU ULIOIBUKA WA WATOTO

Elimu inahitajika ya kupinga ukeketaji na elimu inapaswa kuwalenga hata vijana ambao ndio wanachochea ukeketaji kwa kukataa kuwaoa wasichana ambao hawajakeketwa.

Kutokana na kuwepo kwa kitendo cha watoto wachanga kufanyiwa ukeketaji ni vymema serikali kupitia maafisa wa afya kufanya uchuguzi kwa watoto wanaofikishwa hospital na wakibaini kufanyiwa ukatili wazazi wachukuliwe hatua.