WAFUGAJI WATAKIWA KUJENGA NYUMBA BORA

Na Woinde Shizza,Ngorongoro

KIONGOZI  wa mbio za mwenge kitaifa Amour Hamad Amour,amewahamasisha na kuwakumbusha wafugaji kujenga nyumba bora na kuondokana kuishi kwenye mazingira duni ambayo ni ya umaskini.

Amesema kuwa utitiri wa mifugo  isio na tija  haina nafasi  hivyo akawasisitiza kuwa na mifugo michache itakayowawezesha kuwa na maisha bora badala ya kuendela kuishi maisha duni huku wakiwa na utitiri wa mifugo.

Amour, ameyasema hayo Septemba mosi mara baada ya kuzindua kiwanda cha kusindika mazao yanayotokana na mifugo kinachomilikiwa na wanawake wa kijiji cha Ololosokwani wilayani Ngorongoro,kwenye mbio za Mwenge wa Uhuru.

’’Haina maana kuwa na mifugo mingi wakati unaishi maisha duni badilikeni fugeni mifugo michache yenye tija ili mjenge nyumba bora muondokane na kuishi maisha duni’’alisema Amour.

 Amour,amesema tajiri namba moja duniani ni mfugaji na mkulima  hivyo wafuge kitaalamu na watanufaika na ufugaji wao na pia itawasaidia  kuondokana na  migogoro kati ya wakulima na wafugaji ambayo husababisha uvunjifu wa amani.

Kuhusu raslimali za taifa amewataka wamuunge mkono Rais John Magufuli,ambae amedhamiria kuinua maisha ya wanyonge  kwa kulinda rasilimali za taifa  zilizopo  ndani ya hifadhi ili ziweze kunufaisha wananchi wote  .

.Akakipongeza kikundi hicho  cha kina mama cha wajasiriamali,ambao wameanzisha kiwanda kidogo cha kusindika mazao yatokanayo na mifugo ikiwemo ngozi, pembe na katwo,ambazo hutumika kuzalisha bidhaa mbalimbali kitawezesha kuboresha maisha ya familia zao.

Awali risala ya kikundi hicho imesema kuwa kiwanda hicho kimefadhiliwa na Umoja wanchi za Ulaya,EU kupitia shirika la umoja wa mataifa la elimu,sayansi na utamaduni,Unesco pamoja na halmashauri ya wilaya ya Ngorongoro,ambayo imechangia shilingi  milioni tano kwa ajili ya kuwaunga mkono.

 Risala imesema kuwa uanzishwaji wa kiwanda hicho unatoa fursa kwa wanawake kuweza kushiriki kikamilifu kwenye shughuli za uzalishaji mali na hivyo kuboresha na kuinua maisha ya familia zao.

Akizindua kituo binafsi cha mafuta cha Petrol,Diesel na taa kilichopo Mjini Wasso,kiongozi wa mbio za mwenge kitaifa alipokea changamoto kutoka kwa mmiliki wa kituo hicho Fred Karangai, aliyesema kuna mafuta ya magendo kutoka nchi jirani ya Kenya yanaingizwa kwa njia za panya hivyo kuwaathiri wauzaji wazawa .

Amesema kuwa wao wanalipa kodi lakini wajanja hao ambao huingiza mafuta kwa magendo hawalipi kodi hicvyo kuikosesha serikali mapato na akaoma wadhibitiwe.

Share this: