SIMANJIRO WAPAATIWA CHAKULA CHA MAAFA

WILAYA ya Simanjiro Mkoani Manyara imepatiwa tani 473.8 za mahindi kupitia Ofisi ya Waziri Mkuu kitengo cha maafa,kitakachotolewa kwa wakazi wa wilaya hiyo wanaokabiliwa na njaa baada ya kukumbwa na ukame msimu uliopita.

Akizungumza na waandishi wa habari juzi kwenye mji mdogo wa Mirerani,Mkuu wa wilaya hiyo,Brigedia Jenerali Cosmas Kayombo alisema mahindi hayo yametolewa kwa maeneo yaliyokumbwa na ukame na yatauzwa sh50 kwa kilo.

Brigedia Jenerali Kayombo alisema,wilaya hiyo iliomba kupatiwa kiasi cha mahindi tani 3,000 kutokana na wakazi wengi kuwa na upungufu wa chakula baada ya kukabiliwa na ukame msimu uliopita wa kilimo.

Alisema kutokana na kuongezewa kiasi kidogo cha mahindi tani 473.8 tofauti na hitaji lao waliloomba,itawabidi chakula hicho kidogo walichopatiwa wakigawe kwa kuwapa kipaumbele wana kijiji ambao hawakupata zile tani 988 za awali.

Hata hivyo,mkuu huyo wa wilaya aliagiza ugawaji huo wa chakula hicho ufanyike kwa uhadilifu na atawachulia hatua kali za kisheria watakaohusika kufuja au kutumia chakula hicho tofauti na maelekezo waliyopatiwa.

“Nadhani wote wameelewa maelekezo yangu na sitarajii kutokea ufujaji wowote kwani si busara wazazi kula chakula cha watoto hivyo natarajia zoezi la ugawaji litakwenda kama lilivyopangwa,” alisema Brigedia Kayombo.

Kwa upande wake,Makamu Mwenyekiti wa Mamlaka ya mji mdogo wa Mirerani,Hussein Msokoto alisema  wao walipatiwa kiasi cha tani 222.5 ambazo zitagawanywa kwa watu wanaokabiliwa na ukosefu wa chakula.

Msokoto alisema mahindi hayo yatatolewa kwa watu wenye upungufu wa chakula kwa vitongoji vya Sekondari,Zaire,Kairo,Songambele A,Kazamoyo ,Songambele B,Songambele Sokoni,Mirerani na kitongoji cha Kilimahewa.

Naye,Mwenyekiti wa kitongoji cha Kairo Wilbert Nyari alitoa ombi kwa Serikali kuongeza chakula hicho kwani hakijatosheleza kwa jamii husika,kutokana na kupatiwa kiasi kidogo cha chakula ili hali mahitaji yao ni makubwa.

Share this: