AHUKUMIWA KIFUNGO CHA MIAKA 15 KWA KOSA LA UJANGILI

MKAZI wa Kijiji cha Kibrash Wilayani Kilindi Mkoani Tanga,Abdalah Kisailo (58) amehukumiwa kwenda jela kifungo cha miaka 15 na faini ya sh5 milioni kwa kosa la kukutwa kwenye hifadhi ya Taifa ya Tarangire akitaka kufanya ujangili.

Kisailo alihukumiwa juzi kwenye Mahakama ya Wilaya ya Babati Mkoani Manyara,mbele ya Hakimu Mfawidhi wa Mahakama hiyo Victor Bigambo kwa kosa la kujiandaa kuwinda tembo na kukutwa na bunduki mbili zenye risasi.

Awali,Mwendesha mashtaka wa kesi hiyo,Linus Bugaba alisema Kisailo alitenda kosa hilo Octoba 17 mwaka jana saa 10 jioni,kwenye hifadhi ya Tarangire katika eneo la Kijungu wilayani Kiteto mkoani Manyara.    

Bugaba alisema Kisailo alikamatwa na mhifadhi Richard Shilungi akiwa na silaha aina ya bunduki mbili aina ya Rifle 425 yenye namba ya ZA 52602202 na Rifle 375 yenye namba 42979 na risasi kumi na risasi 15 za kienyeji.

Alisema pia mshatakiwa huyo alikamatwa akiwa na shoka moja na dumu moja la maji hivyo aliiomba mahakama hiyo imepe adhabu kubwa mshtakiwa huyo ili iwe fundisho kwa watu wengine wenye tabia ya kufanya ujangili katika hifadhi.

Hata hivyo,Hakimu Bigambo alikubaliana na ombi hilo na akamuhukumu Kisailo kwenda jela miaka 15 na pia alipe faini ya sh5 milioni kwa makosa mawili ya kumiliki bunduki mbili bila halali na kutaka kufanya ujangili hifadhini.

Share this: