MBUNGE WA VITI MAALUM MANYARA ALAANI UCHAGUZI UCHAGUZI WA MWENYEKITI KITONGOJI ADAI KUWAUMEJAA RUSHWA

MBUNGE wa viti maalum wa Mkoa wa Manyara,Pauline Gekul (Chadema) amelalamikia mchakato wa uchaguzi wa Mwenyekiti wa kitongoji cha Halla B,Kata ya Nangara Wilayani Babati kuwa ulitawaliwa na mazingira ya rushwa.

Katika uchaguzi huo uliofanyika jumapili iliyopita,mgombea wa CCM Edward Paschal alishinda kwa kupata kura 108 dhidi ya mgombea wa Chadema Paulo John aliyepata kura 92 hivyo kushinda kwa kura 16.

Akizungumza na waandishi wa habari jana,Mbunge wa viti maalum wa mkoa wa Manyara (Chadema) Pauline Gekul alisema hawakubaliani na matokeo hayo kwani vitendo vya rushwa vilitumika na hakuna hatua zozote zilizochukuliwa.

Gekul alisema siku moja kabla ya uchaguzi huo,mbunge wa Jimbo la Babati Mjini Werema Chambiri alinusurika kupigwa na wafurukutwa wa Chadema akituhumiwa kutoa rushwa ya sh2,000 na sh,1000 kwa wakazi hao.

“Chambiri aliokolewa na askari polisi wakiongozwa na msaidizi wa mkuu wa upelelezi wa wilaya ya Babati,afande Mathayo aliyembeba garini akampeleka nyumbani kwake badala ya kumpeleka kwenye kituo cha polisi,” alisema Gekul.

Hata hivyo,Chambiri alikanusha vikali kuwa alikuwa anagawa rushwa kwa wapiga kura wa kitongoji hicho kwani yeye alikuwa amemtembelea rafiki yake ambaye ni kiongozi wa CCM wa eneo hilo la kitongoji cha Halla B.

“Nikiwa kwenye nyumba ya rafiki yangu Christopher walikuja vijana wahuni waliokuwa wanataka kunifanyia fujo na mimi nikapiga simu polisi waliokuja kunichukua na kunisindikiza hadi nyumbani kwangu,” alisema Chambiri.

Alisema yeye hakugawa rushwa kwani hagombei nafasi yeyote ile kwenye kitongoji hicho,hivyo wanaoeneza propaganda hizo wamefilisika kisiasa na pia mgombea wa CCM Edward Paschal ni mtu anayejiweza kiuchumi.

“Huwezi kugawa rushwa katika mazingira kama hayo kwanza mimi sigombei chochote na pia ni mimi ni mkazi wa kata ya Nangara hivyo huku ni kwangu,hao wameishiwa sera,sasa wanatunga vitu ambavyo havipo,” alisema Chambiri.

Share this: