MADIWANI MANYARA WASOMEWA TAARIFA YA MIRADI YA MAENDELEO

ILI kubaini mapungufu na mafanikio ya miradi ya kata,Baraza la madiwani wa Halmashauri ya wilaya ya Simanjiro mkoani Manyara wamesomewa taarifa ya miradi ya maendeleo iliyotekelezwa kipindi cha Julai hadi Desemba 2011. 

Hali hiyo imetokana na agizo la mkuu wa mkoa huo,Elaston Mbwilo  alivyoziagiza halmashauri za wilaya za mkoa wa Manyara kufuata utaratibu huo ili kubaini kata ambayo haikutekeleza miradi yake iliyopangiwa.  

Katika utaratibu huo mpya,mlezi wa kata,Ofisa Tarafa,Diwani na Ofisa Mtendaji wa kata husika husimama mbele ya Baraza hilo na kuwasomea madiwani,taarifa ya miradi yao ya maendeleo iliyofanywa kwa kipindi cha miezi mitatu.

Akisoma taarifa ya kata ya Orkesumet,Ofisa mtendaji wake,Shaaban Mkopi alitaja baadhi ya miradi iliyokamilika ni ukarabati wa nyumba ya mkuu wa shule,ujenzi wa wodi ya wazazi kituo cha afya na ukarabati wa mabweni.

Naye,Diwani wa kata ya Msitu wa Tembo,Michael Sinjori alisema baadhi ya miradi waliyoitekeleza ni ujenzi wa kituo cha polisi,ujenzi wa nyumba ya mwalimu wa shule ya sekondari na ukarabati wa ofisi ya kata hiyo. 

Hata hivyo,kata mbili za Terrat na Mirerani hazikusomewa taa

rifa zao,baada ya madiwani wake,Robert Saitabau na Justin Nyari kudai kuwa taarifa hizo hazikupitiwa na kamati za maendeleo za kata zao. 

“Mheshimiwa Mwenyekiti kwa afya ya kikao hiki naomba taarifa ya kata yangu ya Terrat isisomwe,kwani Ofisa mtendaji wa kata William Wanga hakuishirikisha kamati ya maendeleo ya kata yetu,” alisema Saitabau. 

Kwa upande wake,Nyari alisema taarifa hiyo isisomwe kwenye Baraza hilo kwani imeandaliwa na Ofisa mtendaji wa kata yake,Valentine Tesha bila kuishirikisha kamati ya maendeleo ya kata ya Mirerani (WDC).

Kutokana na hali hiyo,Mwenyekiti wa halmashauri ya wilaya hiyo,Peter Tendee na wajumbe wa Baraza hilo walikubaliana na madiwani hao kutosomwa kwa taarifa hizo kutokana na maofisa hao kutowashirikisha wakati wa uandaaji.

“Nadhani hii ni kutokana na jambo hili kuwa geni,maofisa watendaji wa kata mnapaswa kukaa pamoja na kamati zenu za maendeleo na kuandaa kitu kizuri kuliko waheshimiwa madiwani wenu waje kuziona hapa,” alisema Tendee.

Share this: