ZAIDI WATU 56 WAKOSA MAHALA PA KUISHI MANYARA

ZAIDI ya watu 56 wa kijiji cha Shambarai wilaya ya Simanjiro mkoani Manyara hawana mahali pakuishi baada ya nyumba zao kubomoka na kuezuliwa mapaa na upepo mkali ulioathiri nyumba 14 na mazao yaliyokuwa mashambani.

Akizungumza na waandishi wa habari,Diwani wa kata ya Shambarai,Alais Mbarnot alisema tukio hilo lilitokea kwenye kijiji hicho, saa 12 jioni ambapo upepo huo mkali uliosababisha tatizo hilo uliambatana na kimbunga.

Mbarnot alisema nyumba ya mwalimu wa shule ya msingi Shambarai,Salma Mpinga ni miongoni mwa nyumba zilizopata madhara ya kubomoka pamoja na miti na mazao ya mihogo,mahindi,maharage na migomba iliyokuwa shambani.

Hata hivyo,alisema kuwa katika tukio hilo hakuna mtu yeyote aliyejeruhiwa au kufariki dunia zaidi ya mazao mengi yaliyokuwa yamestawi mashambani kuathirika na upepo huo mkali ulioambatana na kimbunga.

Alisema hadi hivi sasa wahanga hao 56 walioathiriwa na janga hilo wanaishi kwa ndugu,jamaa na majirani wakati wakisubiri hatua nyingine zitakazofuata kwani nyumba zao kwa muda huu hazifai kutumika.

Mmoja kati ya shuhuda wa tukio hilo ambaye hakupenda kutajwa jina lake alisema upepo huo umeathiri sehemu kubwa ya vyakula vilivyokuwa mashambani na nyumba hizo 14 kubomoka huku nyingine zikipata nyufa.

“Huo upepo ulikuwa mkali kweli kweli,kwani tangu nizaliwe sijawahi kuona upepo mkali kama huo,nilishuhudia miti mikubwa kama migunga yenye mizizi iliyosambaa ardhini ikiangushwa chini na upepo huo,” alisema.

Alitoa wito kwa Serikali ya wilaya hiyo au mkoa huo,kujaribu kuwasaidia wahanga hao kwani hawakupenda kutokewa na hali hiyo ambapo wengi wao wana kipato kidogo hivyo watazidi kuteseka hadi wajenge nyumba nyingine. 

Share this: