WATAKIWA KUUNGANA ILI KUWEZA KUJIKOMBOA KUPITIA MIKOPO

MKUU wa wilaya ya Simanjiro mkoani Manyara,Khalid Mandia amevitaka vikundi mbalimbali vya ujasiriamali wilayani humo kuungana ili waweze kujikomboa kupitia mikopo inayotolewa na taasisi za fedha.

Mandia aliyasema hayo ,wakati akizundua kikundi cha Jitegemee,kilichopo kata ya Naisinyai Taafa ya Moipo wilayani humo na kudai kuwa watu wengi wamejikomboa kupitia mikopo wanayopata kwenye vikundi vya wajasiriamali.

Alisema wajasiriamali wanaweza kufanikiwa kimaisha kwa kupitia kwenye vikundi kuliko kuwa mtu mmoja mmoja na aliwatakiwa wasiogope kuchukua mikopo kwenye taasisi za fedha ili waweze kujiinua kiuchumi na kujikomboa.

“Nawaeleza ukweli tunaposema maisha bora kwa kila mtanzania inakubidi ujishughulishe kwani maisha bora au Tanzania yenye neema haitapatikana kwa mtu asipojishughulisha na kujiangaisha kwa kutoka jasho,” alisema Mandia

Naye,mlezi wa kikundi hicho,Kilempu Ole Kinoka alisema kikundi cha Jitegemee kilianzishwa Octoba 4 mwaka 2011 kikiwa na wanachama 25 wa jinsia ya kiume na kike huku asilimia kubwa ya wana kikundi wakiwa jamii ya wafugaji.

Ole Kinoka ambaye pia ni Diwani wa kata ya Naisinyai alisema lengo la kikundi hicho ni kuondoa umaskini,kuhamasisha na kutunza mazingira na hadi hivi sasa wamefanikiwa kufungua akaunti yao kwenye benki ya makabwela ya NMB.

Alisema kikundi hicho kinakabiliwa na changamoto mbalimbali ikiwemo kutokuwa na elimu ya ujasiriamali,ukosefu wa mikopo na wanachama kutokuwa na mitaji ya kuendesha miradi itakayowasaidia kulea familia zao.

Wajumbe wa kikundi hicho pia walimpa Mandia,zawadi ya mavazi ya jadi kama kumbukumbu yao kwao,ambapo mkuu huyo wa wilaya aliwashukuru na kuwaeleza kuwa wanazidi kumuonyesha upendo wao na atazidi kuwakumbuka.

Share this: