WACHIMBAJI WA MADINI WAFARIKI DUNIA WAKITAKA KUIBA MADINI

WACHIMBAJI watatu wakazi wa King’ori wilayani Arumeru mkoani Arusha,wamefariki dunia kwa kukosa hewa mgodini baada ya kuingia kwa lengo la kuiba madini kwenye mgodi unaomilikiwa na kampuni ya TanzaniteOne ya mji mdogo wa Mirerani wilayani Simanjiro mkoani Manyara.

Akizungumza na waandishi wa habari ofisini kwake jana,Kamanda wa polisi mkoani Manyara,Liberatus Sabas alisema tukio hilo lilitokea Desemba 28 mwaka huu na aliwataja marehemu hao ni Afrael Amos (22) Baraka Soine (19) na Simon Laban (32) wote wakazi wa King’ori. 

Kamanda Sabas alisema walipata taarifa ya kupotea watu sita walihisiwa waliingia kwa wizi kwenye mgodi huo wa TanzaniteOne kwa lengo la kuiba madini ya Tanzanite lakini baada ya kuwafukua imebainika walikuwa watatu.

Alisema baada ya kufukua mgodi huo wa JW ambao haufanyiwi kazi unaomilikiwa na kampuni ya TanzaniteOne uliopo kitalu C,walikuta miili hiyo mitatu ikiwa imeharibika sana kutokana na kukaa muda mrefu mgodini hapo.

Alisema miili ya marehemu hao imeshachukuliwa na ndugu zao kwa ajili ya shughuli za mazishi baada ya uchunguzi wa daktari kufanyika mgodini hapo kwani miili hiyo ilikuwa imeharibika sana.

Kamanda Sabas alitoa wito kwa wachimbaji wadogo wa madini ya Tanzanite kuchukua tahadhari wanapokuwa wanachimba madini kwani kazi hiyo ni ya hatari hivyo hawatakiwi kuingia kwenye migodi isiyotumika.

“Kazi ya kuingia kwa wizi kwenye mgodi ambao siyo wako siyo nzuri kwani unahatarisha maisha yako kwa kufanya kazi sehemu isiyo salama kama hao walivyoingia kwenye mgodi usio wao na usiotumika,” alisema Kamanda Sabas.

Share this: