SEREKALI HAIWEZI KUWAONDOA WAWEKEZAJI WA MADINI

IMEELEZWA kwamba Serikali iliyopo madarakani haipo tayari kuwafukuza wawekezaji wakiwemo wachimbaji wakubwa wa madini ya Tanzanite hivyo wachimbaji wadogo wanatakiwa kushirikiana nao.

Hayo yalisemwa na Mkuu wa mkoa wa Manyara,Elaston Mbwilo wakati akizungumza jana mji mdogo wa Mirerani wilayani Simanjiro na wadau na wachimbaji wa madini ya Tanzanite.

Mbwilo aliyasema hayo akiwa na Kamati ya ulinzi na usalama ya mkoa huo na Kamati ya ulinzi na usalama ya Taifa iliyoongozwa mjumbe wa kamati hiyo Peter Bachubira na lengo lake likiwa kuona hali ya maendeleo ya wachimbaji mazingira ya uchimbaji,changamoto na mahusiano ya wachimbaji hao.

Mbwilo amewataka wachimbaji wadogo wa madini ya Tanzanite kushikiriana na wachimbaji wakubwa wa madini hayo kwani Serikali inayoongozwa na CCM inawakubali wawekezaji na haitawafukuza.

Alisema Sera ya Serikali ya chama kilichopo madarakani kinawakubali wawekezaji hao hivyo kama wanataka wawekezaji hao waondoke wasubiri hadi chama kingine kiingie madarakani.

“Ilani ya Serikali ya CCM inakuwakubali wawekezaji na siyo kuwafukuza,ombeni mpatiwe vifaa vya uchimbaji na siyo kumfukuza mwekezaji,lakini kama mnadai Rais aliwaahidi atawapa eneo la wawekezaji nitamkumbusha,” alisema Mbwilo.

Aliyasema hayo baada ya wachimbaji wadogo wakiongozwa na Mwenyekiti wa chama cha wachimba madini wadogo mkoani Manyara (MAREMA) kudai Rais Jakaya Kikwete aliahidi kuwapa eneo la kitalu C baada ya leseni yao kumalizika.

Mwenyekiti huyo,Zephania Mungaya alisema wachimbaji wadogo wanatakiwa kupatiwa eneo hilo kwani hivi sasa wanachimba kitaalamu na pia sheria ya madini hairuhusu madini ya vito kuchimbwa na wageni.

Mughaya alisema hivi sasa wanachimba kitaalamu kwani zaidi ya migodi 40 imefungwa vifaa vya kisasa na ajali za migodini zimepungua kutoka vifo vya watu 20 kwa mwaka hadi watu sita,wawili au hakuna kabisa kwa mwaka.

Kwa upande wake Jafari Bakary alisema usalama wa Taifa watakuja kuulizwa walikuwa wapi wakati mali za Taifa zikichukuliwa kwani wasimamizi wa Serikali wamechangia Mirerani kuzidi kuwa nyuma kwa maendeleo.

Bakary alisema wasimamizi wa Serikali wamechangia mji huo kutopata maendeleo kwani una watu zaidi ya 50,000 lakini kuna kata mbili pekee hivyo kuzidi kudidimiza maendeleo kwa kutopatiwa mahitaji ipasavyo.

Naye,Kaanael Minja alisema japokuwa madini ya Tanzanite yanachimbwa eneo la Mirerani peke yake hapa duniani lakini maendeleo yaliyopo hayafanani na hazina inayopatikana kwenye eneo hilo.

Minja alisema kwenye machimbo hayo zimefika tume nyingi za madini lakini hazijawapatia wananchi majibu mazuri lakini wajumbe hao wanauwezo wa kufikisha ujumbe kwa Rais Jakaya Kikwete kwani ni mtu msikivu na anayeelewa.

Share this: