ATOMEK KUDHIBITI BIDHAA ZISIZO SALAMA

KAMPUNI ya Atomtek Nuclear Energy ya Uturuki inatarajia kutumia dola milioni 10 za Marekani kwa ajili ya kuimarisha ulinzi maeneo ya bandarini, viwanja vya ndege na barabarani ili kuhakikisha mali zinazosafirishwa zinakuwa salama.

Hayo yamebainishwa na Ofisa Habari wa kampuni hiyo, Yusufu Mjema, alipokuwa akitoa taarifa ya kampuni hiyo mjini Arusha, ambayo imeomba serikali kuwekeza hapa nchini ili kuimarisha ulinzi kwa kuongeza vifaa kwenye maeneo husika ili  kudhibiti uingizaji wa bidhaa zisizo salama.

Mjema alisema endapo kampuni hiyo itapewa kibali cha kuanza uwekezaji hapa nchini katika awamu ya kwanza itatumia kiasi hicho cha fedha na kwamba itaendelea kutumia dola milioni 80 za Marekani ambapo itaweka mitambo ya magari 400 bandarini na helikopta.

Alisisitiza kuwa endapo kampuni hiyo itakubaliwa, itasaidia kutokana na vifaa vilivyopo sasa kutokidhi mahitaji katika maeneo husika na itaweza kuona mali ambayo si salama inayosafirishwa kwa njia ya meli mita 300 kabla ya kutia nanga na kwa upande wa ndege futi 1,800 kutoka angani huku magari yakifanya doria katika maeneo mbalimbali.

“Kampuni hii ya Uturuki inaomba kuwekeza hapa nchini ili kusaidia serikali kuimarisha ulinzi na kuhakikisha bidhaa zote zinazosafirishwa kwa njia zote ni salama na endapo maombi yatapitishwa itaanza kazi Julai mwaka huu,” alisema.

Kwa upande wake Dennis Mwalongo ambaye ni mwanasayansi katika Tume ya Taifa ya Nguvu za Atomu mkoani Arusha alisema tume hiyo inafanya kazi ya kuhakiki vifaa vinavyotumika katika sehemu za mionzi ili kuona iwapo imezidi na kutoa ushauri kwa wafanyakazi.

Alisema wagonjwa wanaotibiwa kwa njia ya mionzi wanapata tiba sahihi, tume hiyo pia hupima kiwango cha mionzi kwa wafanyakazi wa sehemu za mionzi na kuwashauri kama kiwango kipo juu ili kuepusha hatari ya kupata saratani.

Mkurugenzi wa kampuni hiyo, Ibrahim Kuzu na wafanyakazi wengine wamefanya ziara ya siku moja katika tume ya Atomu Arusha kuangalia namna vyakula na vitu vingine vinavyopimwa kwenye maabara na kutambua elementi zilizopo iwapo zipo juu ya kiwango na kushauri kutotumika kwa bidhaa husika.

Share this: