MFANYA BIASHARA MAHARUFU AFIKISHWA ASHIKILIWA NA POLISI

JESHI la Polisi Mkoani Manyara linamshikilia mfanyabiashara maarufu wa madini ya Tanzanite,Elitabu Mkenga (39) kwa kudaiwa kuwatishia na bastola polisi wa Mirerani walioingia kukagua mgodi wao unaodaiwa kuua mchimbaji wa mgodi mwingine kwa baruti na kujeruhi wachimbaji wawili.

Kwa mujibu wa Kaimu Kamanda wa polisi mkoani Manyara,Eurelia Msindai tukio hilo lilitokea kwenye eneo la machimbo ya Tanzanite kitalu “B” (Opec) mji mdogo wa Mirerani wilayani Simanjiro.

Kaimu Kamanda Msindai alisema mchimbaji aliyekufa na waliojeruhiwa ni wafanyakazi wa mgodi wenye PML namba 0001393/96 wa kampuni ya Building Utilties unaomilikiwa na Simon Meshak mkazi wa mkoani Arusha.

Alimtaja mchimbaji huyo aliyefariki ni John Alex (36) mkazi wa Sanawari mkoani Arusha ambaye baruti hiyo ilimkata mkono wa kuume,utumbo ulitoka nje na mguu wa kuume ulikatika kwenye ajali hiyo.

Aliwataja majeruhi hao ni Jeremia Ramadhan (34) mkazi wa Mirerani aliyejeruhiwa bega la kuume,kifua na John Daimon (25) mkazi wa Kazamoyo  Mirerani aliyejeruhiwa goti la kushoto.

“Baada ya wachimbaji hao kulipuliwa na baruti viongozi wa mgodi walitoa taarifa kituo cha polisi Mirerani kuwa mgodi unaomilikiwa na John Mkenga wenye PML 00000021 ndiyo ulisababisha ajali hiyo,” alisema Msindai.

Alisema polisi walipofika mgodini hapo waliokuwa kwenye mgodi wa Mkenga waligoma kufungua geti wakidai kuwa ndugu wa mmiliki,Elitabu Mkenga ana ufunguo,ndipo polisi wakatumia nguvu na kuingia ndani ya mgodi huo.

Alisema polisi walipoingia Elitabu Mkenga (39) ambaye ni mdogo wa mmiliki wa mgodi huo na mfanyabiashara maarufu wa madini ya Tanzanite wa mjini Arusha aliwatishia askari hao kwa kupiga risasi hewani kwa kutumia bastola yake.

Kaimu Kamanda Msindai alisema polisi hao wakiongozwa na msaidizi wa Mkuu wa kituo cha polisi Mirerani Mkaguzi wa polisi Wenceslaus Gumha na askari wapelelezi Isack na Allen walitishiwa na Elitabu Mkenga na bastola aina ya brown.

“Hata hivyo polisi walifanikiwa kumtia mbaroni na hadi hivi sasa yupo mahabusu kituo cha polisi Mirerani na anatarajia kufikishwa Mahakamani baada ya uchunguzi wa tukio hilo kukamilika,” alisema Msindai.

Kaimu Kamanda Msindai alisema mwili wa marehemu huyo umehifadhiwa kwenye hospitali ya mkoa wa Arusha Mount Meru na majeruhi hao nao wamelazwa kwenye hospitali hiyo ya Mount Meru.

Share this: