WACHANGIA FEDHA WANAWAKE

JUMLA ya kiasi cha $ 80,000 zikiwemo ahadi ambazo ni kiasi cha sh,10.5 milioni zimepatikana katika harambee ya kuchangia mfuko wa kuwawezesha wanawake ambao ni wachimbaji madini mkoani hapa huku kampuni kubwa ya uwekezaji ya madini ya Tanzanite One ikichangia jumla ya $ 20,000. Fedha hizo zilichangwa mwishoni mwa wiki iliyopita kwa lengo la kuwawezesha wanawake ambao ni wachimbaji madini mkoani ili waweze kupatiwa elimu ya uchimbaji madini sanjari na mbinu za ukataji wa madini,vito na upambaji kwa ujumla. Akizungumza kabla ya kuzindua zoezi la uchangishaji wa fedha hizo mgeni rasmi ambaye ni waziri wa nchi ofisi ya waziri mkuu uwekezaji na uwezeshaji ,Dk Mary Nagu alisema kwamba pamoja na kwamba asilimia kubwa ya wanawake nchini kuwa ni watuamiaji wa vito na madini mbalimbali lakini wengi wao hawanufaiki kupitia sekta hiyo. Alisema kwamba asilimia kubwa ya wanawake wengi nchini wanaojishughulisha na biashara ya madini mbalimbali hawana elimu ya kutosha kuhusiana na uchimbaji wa madini hivyo fedha hizo zitasaidia katika kuwawezesha kupatiwa elimu ili waweze kufanya kazi zao kwa ufanisi mkubwa. “Hakuna kitu kitakachowakwamua wanawake nchini zaidi ya elimu,kama tukiwakwamua wanawake basi tujue tumeikwamua jamii kwa ujumla na watafanya vizuri zaidi”alisema Nagu Naye,mwenyekiti wa bodi ya kampuni uchimbaji madini ya Tanzanite One iliyopo wilayani Simanjiro mkoani Manyara,Ami Mpungwe alisema kwamba wao kama wadau wakubwa wa sekta ya madini nchini wameamua kuwakwamua wanawake waliopo ndani ya sekta hiyo kwa lengo la kuleta maendeleo nchini. Alisema kwamba ni wajibu wa kila mdau aliye ndani ya sekta hiyo kuwakwamua wanawake mbalimbali wanaojishughulisha na biashara hiyo ya madini kwa lengo la kuinua uchumi wa nchi na kupunguza umaskini uliokithiri ndani ya jamii mbalimbali za kitanzania. “Sisi kama Tanzanite One ni wajibu wetu kuwasaidia wanawake wote walioko ndani ya jamii hususani wachimbaji wa madini,tuko kwa ajili ya kusaidia kuinua uchumi wa nchi kuleta maendeleo ”alisema Mpungwe ambaye aliwahi kuwa balozi wa Tanzania nchini Afrika kusini Awali katibu mkuu wa wizara ya nishati na madini nchini,Eliakim Maswi alisema kwamba wizara yao itashirikiana bega kwa bega kuhakikisha inasaidia kuandaa na kuboresha maonyesho makubwa ya madini na vito kila mwaka.

Share this: