WANANCHI WAPONGEZA SEREKALI KWA UPANUZI WA BARABARA

WANANCHI wa kijiji cha Olgilai kata ya Oltoroto wilayani Arumeru mkoani Arusha wameiunga serikali mkono katika swala la upanuzi wa barabara ambao ulikuwa ukisua kwa muda mrefu kutokana na baadhi ya wananchi kutoafiki swala hilo na hivyo kupelekea zoezi hilo kusitishwa .

Hata hivyo uamuzi huo umekuja baada ya wananchi hao pamoja na viongozi ngazi ya kijiji, kuafikiana kwa pamoja na kukubali kupisha upanuzi wa barabara katika kijiji hicho unaofanywa na halmashauri ya Arusha vijijini.

Aidha wananchi hao wamekubaliana katika mkutano mkuu wa kijiji cha Olgilai uliowashirikisha wananchi mbalimbali kutoka kijiji hicho uliolenga kujadili agenda mbalimbali kubwa zaidi ikiwa ni ya upanuzi wa barabara kutoka Sekei hadi Olgilai.

Hata hivyo wananchi hao kwa pamoja na viongozi mbalimbali wa kijiji walikubaliana kupeana muda wa wiki moja kuhakikisha kuwa kila mwananchi awe ametoa fensi katika eneo hilo, geti, na mazao mbalimbali yaliyoko ili kupisha upanuzi wa barabara ambao utaanza mapema tu watakapomaliza zoezi hilo.

Aidha kikao hicho ambacho kiliendeshwa na Mwenyekiti wa kijiji hicho,Jackson Boaz kwa kushirikiana na Mtendaji wa kijiji hicho , Mathias Mollel ambapo wananchi mbalimbali walieleza maoni yao kuhusiana na upanuzi huo wa barabara ikiwemo la kuomba kulipwa fidia kwa wananchi watakaovunjiwa nyumba zao kupisha upanuzi huo.

Ambapo wananchi hao kwa nyakati tofauti wkichangia mada hiyo walisema kuwa, wao kwa ujumla wanapenda maendeleo sana katika kijiji chao ila wangeomba serikali iweze kuwafidia wale ambao watabomolewa nyumba zao huku ikilinganishwa kuwa sio nyumba nyingi zitakazopitiwa katika upanuzi huo wa barabara.

Wakichangia kwa nyakati tofauti mada hiyo, wananchi hao ambao ni Godwin Masangwa na Gadiel Losoroye walisema kuwa, swala zima la upanuzi wa barabara limekuwa likileta maswali sana kwa wananchi walio wengi katika kijiji hicho ambapo wengi wao wamekuwa wakitaka kujua hatma ya nyumba zao zitakazobolewa kupisha upanuzi huo wa barabara.

Ambapo walisema kuwa ,walishawahi kuandika barua kwa Mkurugenzi wa halmashauri hiyo wakiomba kufikiriwa wananchi ambao nyumba zao zitabomolewa angalau walipwe fidia kutokana na kuwa walijenga nyumba hizo kipindi ambacho sheria hiyo ya upanuzi wa barabara ilikuwa haipo na hawakujua kuwa hilo ni eneo la barabara.

Wakisomewa barua iliyojibiwa na Mkurugenzi wa halmashauri hiyo, Halifa Ida ambayo inasema kuwa, wao kama halmashauri hawana fedha zozote za kuwalipa fidia wananchi watakaobolewa nyumba zao , kwani hadi sasa hivi wamekwisha pokea kiasi cha shs 100 milioni kutoka mfuko wa barabara kwa ajili ya upanuzi wa barabara hiyo ya kutoka Sekei hadi Olgilai kwa kiwango cha changarawe.

Naye Mwakilishi wa mhandisi kutoka halmashauri ya Arusha vijijini, Frank Mwanga alisema kuwa, wanachopaswa kujua wananchi ni kuwa kwa sasa hivi upanuzi wa barabara utafanyika katika mita 7.5 kwa 7.5 kutoka upana wa barabara .

Alisema kuwa , wananchi wanapaswa kujua kuwa , hifadhi ya barabara ni mita 20.5 kutoka upana wa barabara ambapo kwa sasa hivi wanapanua barabara ili kuwezesha magari mawili kupishana ambapo wataanza na mita 7.5 tu, hivyo wananchi wanachopaswa kujua ni kuhakikisha kuwa wanakuwa makini wanapotumia mita hizo huku wakijua kuwa ni hifadhi ya barabara na itatumika wakati wowote.

Aidha barabara itakayopanuliwa ni kilometa 5.3 kutoka sekei kata ya Sokon 1 hadi kijiji cha Olgilai kilichopo kata ya Oltoroto .

Diwani wa kata ya Oltoroto ,Gibson Meseiyeki alipongeza uamuzi wa wananchi wake kufikia hatua ya kuunga mkono swala hilo la maendeleo kwani inaonyesha wazi ni jinsi gani wanawaunga mkono viongozi wao na ni mfano wa kuigwa kwa wananchi wengine.

Alisema kuwa, wananchi wengi wamekuwa ndio kikwazo kikubwa cha kuwakatisha tamaa viongozi mbalimbali wanapobuni miradi , kutokana na kutounga mkono miradi hiyo, hivyo aliwataka wananchi hao ambao wapo kwenye hifadhi ya barabara kutoendeleza shughuli zozote ili kupisha upanuzi huo wa barabara na kuondokana na usumbufu mbalimbali.

Share this: