ASKARI AFUKUZWA KAZI KWAKUPIGA RISASI MATAIRI YA TREKTA

ASKARI Polisi wa Idara ya Upelelezi wa Kituo cha Polisi Mirerani Wilaya ya Simanjiro Mkoani Manyara amefukuzwa kazi kwa kosa la kupiga risasi matairi ya matrekta mawili yaliyokuwa yanakwenda kulima Wilayani Kiteto mkoani humo.

Uchunguzi wa libeneke   umebaini kuwa askari polisi huyo amefukuzwa kazi kutokana na kupiga risasi matairi ya matrekta hayo na katika tukio hilo hakuna aliyejeruhiwa kati ya madereva na wasaidizi wao waliokuwa wamepakia.

 Uchunguzi huo umebaini kuwa askari polisi huyo wa idara ya upelelezi wa makosa ya jinai (CID) wa kituo cha polisi Mirerani ametambulika kuwa ni mwenye namba G.2668 D/C Nathanael.

Hata hivyo,Kamanda wa polisi Mkoani Manyara,Kamishna msaidizi Liberatus Sabas alithibitisha kufukuzwa kazi kwa askari huyo wa idara ya upelelezi Nathanael ambaye alikuwa askari kwenye kituo cha polisi Mirerani.

Kwa mujibu wa rafiki wa askari polisi huyo ambaye jina lake tunalihifadhi Nathanael amefukuzwa kazi kutokana na kitendo chake cha kupiga risasi matairi ya trekta zilizopita pembeni ya kituo hicho cha polisi yakienda shambani.

Alisema trekta hizo zilikuwa zinaendeshwa kutoka eneo la Ngarenairobi wilaya ya Siha mkoani Kilimanjaro zikielekea wilayani Kiteto mkoani Manyara kwa ajili ya kulima mashamba ya wakulima kwa kulipwa fedha.

Hata hivyo chanzo chetu cha habari kimeeleza kwamba baada ya askari huyo Nathanael kupiga risasi matairi ya matrekta hayo madereva hao waliwasiliana na mmiliki wake ambaye aliwasiliana mara moja na Mbunge  wa jimbo lao.

Inadaiwa mbunge huyo ambaye pia ni Naibu Waziri wa wizara moja nyeti nchini na pia Waziri mchapakati mwenye ushawishi mkubwa kwa jamii aliwasiliana na kigogo mmoja mkubwa wa polisi ili askari huyo achukuliwe hatua.

“Bosi huyo wa polisi alipiga simu mara moja kwa mmoja wa madereva wa matreka hayo aliyekuwa kituo cha Mirerani na kumtaka ampe simu askari huyo Nathanael ambaye alizimia baada ya bosi huyo kujitambulisha kwake,” alisema.

Alisema usiku huo huo wa tukio hilo askari huyo Nathanael alilazwa mahabusu kwa muda wa siku tatu kwa amri ya mkuu wa kituo cha polisi Mirerani (OCS) Elisha Saenda na baada ya muda wa siku kadhaa ndipo akafukuzwa kazi.  

Mwaka juzi,askari polisi wa kituo cha Orkesumet makao makuu ya wilaya hiyo ambaye alikuwa analinda benki ya makabwela ya NMB Tawi la Orkesumet alifukuzwa kazi baada ya kupiga risasi hewani bila sababu ya msingi.

Inadaiwa askari polisi huyo alivuta bangi na kulewa hivyo kuanza kupiga risasi hewani bila sababu yoyote hivyo kutishia watu waliokuwa karibu na eneo hilo huku akitaka kuonana na Kamanda wa polisi wa mkoa huo au IGP.

Share this: