MAISHA YA WAKILI MWALE YAPO HATARINI

WAKILI maarufu  jijini Arusha , Median Mwalle anayeshikiliwa katika gereza kuu la Kisongo mjini hapa,kwa tuhuma za uhujumu uchumi,amedai  maisha yake yako hatarini , kufuatia hatua ya mawakili wa serikali kumfuata mara kwa mara katika gereza hilo, wakitaka wamchuke wampeleke kusikojulikana jambo alilodai kuwa na mashaka  na usalama wa maisha yake .

Mwale ambaye yupo rumande  kwenye gereza hilo kutokana na kesi inayomkabili kutokuwa na dhamana, alitoa malalamiko hayo leo  mbele ya hakimu mkazi , Devotha Msofe aliyekuwa akiahirisha kesi hiyo ya jinai namba 330/11 kwa niaba ya hakimu mkazi mfawidhi , Charles Magesa anayesikiliza shauri hilo ambapo upande wa serikali uliwakilishwa na mawakili Fredrick Manyanda na Neema Ringo .

Akiongea mahakamani hapo, wakili wa Mwale , Loom Ojare  alisema kuwa amelazimika kutoa taarifa hiyo ili kuweka kumbukumbu mahakamani hapo,kutokana na jambo linalomsibu mteja wake, kwani jambo lolote linaweza kumpata wakati wowote kutokana na matukio ya kufuatwa  gerezani siku na mawakili hao wakati  kesi inayomkabili ipo mahakamani.

Hata hivyo hakimu Msofe alisema kuwa ni vema suala hilo akaliwasilisha mbele ya hakimu Magesa anayesikiliza shauri hilo ili aweze kufanya maamuzi, ambapo alipangia shauri hilo lirudi mahakamani kwa ajili ya kutajwa machi 28 mwaka huu .

Malalamiko ya wakili huyo yamekuja siku chache baaada ya mahakama hiyo kuwaagiza Mkurugenzi wa Makosa ya Jinai nchini (DPP), Kamishna Mkuu wa Mamlaka ya Mapato Tanzania (TRA) na Meneja wa TRA Mkoa wa Arusha kurudisha mali za wakili hiyo zilizokuwa zikishikiliwa na mamlaka ya mapato TRA,yakiwemo magari saba na simu za mkononi kwa mshtakiwa Mwale, anayetuhumiwa kupatikana na fedha chafu.

Uamuzi wa kurudishiwa mali zake  ulitolewa na  Hakimu Mkazi Mfawidhi  Magesa ambaye alisema baada ya kupitia ushahidi wa pande zote, mahakama yake  imeridhika kuwa mamlaka hizo zilikamata magari hayo kinyume cha sheria ya matunda ya uhalifu (Proceeds Crimes Act) pamoja na vifungu namba 41 na 44 vya sheria ya mwenendo wa kesi za jinai.

Hukumu ya hakimu Magesa ilisema kuwa Ukamataji  huo ulikuwa ni kinyume cha sheria kutokana na kitendo cha upande wa mashitaka cha kukamata magari hayo, hivyo mahakama iliamuru kuwa Mkurugenzi wa Makosa ya Jinai  nchini, Ofisi ya Kamishna Mkuu wa TRA nchini na Meneja wa TRA Mkoa wa Arusha ambao walihusika katika zoezi la ukamataji wa mali hizo kuhakikisha wanazirudisha  kwa mshitakiwa haraka iwezekenevyo.

Magari ambayo mahakama hiyo iliamuru kurudishwa nyumbani kwa mshitakiwa ni T 690 BEW aina ya Range Rover, T 643 BTS Land Rover Discovery, T 907 BTS BMW, T 118 BRS Cadillac Escalade, T 499 APX Land Cruiser, T 520 BBJ BMW, ambayo yalichukuliwa Novemba mosi pamoja na gari  T 660 BCG Toyota Chaser lililokamatwa Desemba 8, mwaka jana.Kesi hiyo inarajia kutajwa tena machi 28 mwaka huu.

Wakati huo huo mfanyabiashara maarufu nchini na mkaazi wa jijini Arusha,Salimu Alii (70)anaendelea kusota katika gereza kuu  la ukonga jijini Dar es salaam, baada kukamatwa na polisi  kwa tuhuma za kupatikana na hatia za kuhujumu uchumi na kufanya biashara ya kuuza binadamu nje ya nchi kinyume cha sheria.

Salimu Alii anasifika kwa kuasaidia watu mbalimbali jijini Arusha,alikamatwa jijini hapa ,mwanzoni mwa mwaka huu,na kusafirishwa kwenda jijini Dar es salaamu alikofunguliwa mashitaka ya kuhumu uchumi kwa kupatikana na fedha chafu na kusafirisha binadamu.

 A

Kwa mujibu wa sheria za hapa nchini,kosa la kuhujumu uchumi na biashara ya watu hayana mdhamana.

Share this: