WATANZANIA WATAKIWA KUFANYA KAZI KWA BIDII

 Wabunge nao wanajitokeza kwa wingi kumnadi mgombea wao

wananchi bado wanaendelea kufatialia kampeni hapo ni  Kijiji cha Akeli Arumeru Mashariki ambapo CHADEMA Wamemsimamisha  Joshua Nassari Kuwa Mgombea wa kiti cha Ubunge Arumeru mashariki. 

 

 

 

 

Chama Cha Demokrasia na Maendeleo (Chadema), kimetangaza mkakati wa kutotegemea ruzuku ya Serikali pamoja na fedha chafu katika harakati zake za kisiasa kwa kuwa utegemezi huo unavidumaza vyama vya siasa.

Mwenyekiti wa Chadema Taifa, Freeman Mbowe, alitangaza mkakati huo juzi usiku mjini hapa alipokuwa akizindua mpango wa Movement for Change (M4C), ambao unalenga kuwafanya wananchi wa kada zote kukichangia ili kiweze kuendesha harakati za mageuzi ya kidemokrasia.

Alisema amepata taarifa kwamba Chama Cha Mapinduzi (CCM), kinalenga kufuta ruzuku kwa vyama vya siasa kwa lengo la kukikomoa chama chake, akieleza kwamba serikali inataka kuafiki hila hiyo kwa kuwa vyama vingi vinategemea ruzuku kujiendesha.

"Tumebaini hila hii mbaya yenye lengo la kuviumiza vyama vya siasa na sisi tumeamua kuzindua Movement for Change ili kuwapa fursa Watanzania wenye mapenzi mema na taifa letu kuchangia harakati za ukombozi wa demokrasia kama walivyofanya babu zetu wakati wa kudai uhuru wetu," alisema.

Alisema kupitia mpango huo, Chadema inalenga kutoa elimu ya uraia pamoja na ya Katiba nchi nzima, kuanzia ngazi ya Kijiji, Kata, Tarafa hadi Taifa.

Alisema "tunataka chama chetu kitokane na watu, wanaoongozwa na viongozi wasafi waliochaguliwa na watu wenye mapenzi mema, ambao hawatokani na fedha za mafisadi."

Mbowe alisema M4C, hautapokea fedha chafu ama za mafisadi kwa kuwa fedha zitakazopatikana zinalenga kuwafundisha wananchi haki zao na namna ya kuzidai.

"Hatutavunja sheria, tutaheshimu serikali na vyombo vyote vya dola lakini hatutakubali kuonewa, tutawaambia Watanzania kwamba haki haiombwi bali inadaiwa na wawe jasiri kuidai," alisema.

Mbowe aliongeza kwamba "leo tunazindua mpango wa kuondoa woga kwa Watanzania kwa sababu wengi wanaishi kwa hofu wakidhani kusaidia upinzani ni kufilisika."

Alisema “tunajua wanajipanga kufuta ruzuku…tunawaambia wameshachelewa, wakiamua kufuta ruzuku waanze hata kesho. Chadema imejengwa na wanachama wenye moyo, ilikuwa hivyo, imekuwa hivyo, itakuwa hivyo na itaendelea kuwa hivyo.”

Uzinduzi wa mpango huo ulihudhuriwa na viongozi mbalimbali wa chama hicho wakiwemo wabunge pamoja na wafanyabiashara wa Jiji la Arusha.

Katika uzinduzi huo, M4C iliweza kuchangisha fedha taslimu Sh. milioni 150 ambazo zilichangwa papo hapo, hundi na kupitia mitandao ya simu za mkononi.

Kwa upande wake, Katibu Mkuu wa Chadema, Dk. Wilbrod Slaa, alisema chama hicho kimeendelea kupata mafanikio ya kisiasa kutokana na mfumo wa kiongozi kilichojiwekea hususani uwakilishi unaofanywa na wabunge wake ndani na nje ya Bunge.

"Tutapambana na tunasema safari hii hatutakubali kuibiwa kura, tunasema kabisa kwamba Arumeru kama haki haitatendeka patachimbika," alisema.

Dk. Slaa amvaa Lowassa

Katika hatua nyingine, Dk. Slaa amemshambulia Mbunge wa Monduli (CCM), Edward Lowassa, anayedaiwa kuwasili jimboni Arumeru Mashariki kimya kimya kwa ajili ya kukiongezea nguvu chama chake akifanya kampeni za chini chini kwa ajili ya kumsaidia mgombea wa CCM, Sioi Sumari.

Akihutubia mikutano ya hadhara katika Kata za King'ori, Leguruki, Makiba na Usa River jana, Dk. Slaa alisema Lowassa hana sababu ya kujificha kwa kufanya kampeni za chini na badala yake amemtaka apande jukwaani ili washindane kwa hoja.

"Lowassa alijiuzulu uwaziri mkuu kwa kashfa ya wizi, leo anapita chini chini kuwaambia nini? Mwambieni apande jukwaani tumpe haki yake...tumkaange," alisema.

Alisema inashangaza kumwona Lowassa akijipendekeza kwa wananchi wa Meru wakati huu wa uchaguzi ilhali alikuwa na nafasi ya kuwaletea maendeleo alipokuwa mtumishi serikalini hasa alipokuwa Waziri Mkuu.

"Ninyi mna shida ya maji, zahanati, barabara, shule na viongozi wenu wa Halmashauri wanafuja fedha zenu na hajawahi kuwasaidia, leo atawezaje? Kama anabisha mwambieni apande jukwaani anadi sera sio kuzungumza na mtu mmoja mmoja," alisema.

NASSARI NA MFUKO WA JIMBO

Kwa upande wake, mgombea ubunge katika jimbo la Arumeru Mashariki, Joshua Nassari, alisema Tanzania na hususani mkoa wa Arusha, inautajiri mwingi wa madini pamoja na ardhi lakini wananchi wake wanakabiliwa na umasikini uliokithiri.

"Nimekwenda Kata ya Magadini, mama mmoja akaniambia alijifungulia kwenye gari linalokokotwa kwa Punda akiitafuta hospitali, Arumeru Mashariki inakabiliwa na changamoto nyingi wakati tumekuwa tukitengewa mamilioni ya fedha kila mwaka, nichagueni mimi nikazisimamie kwa manufaa ya Meru," alisema.

Alisema kila mwaka kwa miaka mitatu mfululizo, mfuko wa maendeleo ya jimbo (CDF), ambao umekuwa ukitengewa fedha zinazosimamiwa na mbunge wa jimbo husika, umekuwa ukitengewa Sh. milioni 47 lakini matumizi yake hayaonekani.

"Mkinichagua niwawakilishe, nitarudi kwenye kila kata tuainishe kwa pamoja mahitaji ya kila eneo ili tuyatekeleze kwa awamu, tunahitaji maji, barabara, madawati na dawa kwenye zahanati na sio kufutana machozi," alisema Nassari.

Nassari aliwataka wananchi wa jimbo hilo wamchague kwa kuwa "siendi bungeni kulala wala kuzomea, bali kuwawakilisha ninyi."

MJADALA WA AJIRA WAIBUKA TENA

Suala la mjadala wa tatizo la ajira kwa vijana limeibuka tena katika kmpeni za uchaguzi mdogo wa Jimbo la Arumeru Mashariki baada ya Mbunge wa Vijana wa Chama cha Mapinduzi (UVCCM), Ester Bulaya kuwataka wapiga kura kutoona tatizo hilo limeletwa na Serikali ya chama hicho.

Bulaya aliyasema hayo wakati akimnadi mgombea wa CCM, Sioi Sumari katika viwanja vya Patandi kwenye mkutano wa kampeni za CCM.

Alisema kuwa tatizo la ajira ni tatizo ambalo linaikabilI hata nchi zilizoendelea zaidi ya Tanzania.

Alitoa mfano wa nchi ya Afrika ya kusini ambayo ina vijana zaidi ya milioni tatu ambao hawana ajira.

Alisema watanzania wanapaswa kuacha kuwa watumwa wa maneno ya uongo yanayosamabazwa na wapinzani wa Serikali ya CCM ya kuwa imewaacha vijana.

Alisema kuwa matatizo yanayowakabili vijana hayajasababishwa na CCM ambayo kwa nia njema inatengeneza sera na mipango mbalimbali ya kusaidia kupunguza tatizo hilo.

Naye Sioi akiomba kura aliwataka vijana kumuunga mkono kwa kumpa kura zote ili ashirikiane nao katika kuanzisha miradi ya kupunguza makali ya umasikini.

Aliwataka kutokubali kudanganywa na wapinzani wake kisiasa ambao hawana serikali na kuwataka kuiunga mkono CCM kwa kumpa kura. “Eneo hili ndio nyumbani vijana msiniangushe na mimi sitawaangusha mkinipa kura zenu,” alisema.

Na katika hatua nyingine mgombea huyo wa CCM alifanya mkutano na waandishi wa habari na kuelezea kwa undani sera na mikakati yake ya kushughulikia matatizo mbalimbali yanayowakabili wananchi wa jimbo hilo ikiwa atafanikiwa kupata nafasi ya uwaikilishi bungeni.

Alisema kuwa tatizo la maji na ajira kwa vijana ni mambo ya msingi sana atakayoshuhulikiwa ikiwa atapata nafasi hiyo.

“Vijana wafahamu wakinipa kura nitawahamasisha waanzishe vikundi vya ujasiriamali ,uanzishawaji wa viwanda vidogo vidogo ili kutoa fursa za kiuchumi”alisema Sioi.