WATAKIWA KUSAIDIA VIKUNDI VYA ULINZI SHIRIKISHI

JAMII nchini imeshauriwa kuvisaidia vikundi vinavyojitolea kufanyakazi ya ulinzi shirikishi  (polisi jamii )kwa kuvipatia msaada wa vitendea kazi ili kuvipa nguvu na moyo wa kufanya kazi ya kutokomeza uhalifu nchini.

Akizungumza kwa niaba ya mkuu wa polisi  wilaya ya Arusha(OCD ), Zuberi Mwombeji katika hafla fupi ya kukabidhi Sare kwa ajili ya kikundi cha  polisi jamii kilichopo mtaa wa makaburi ya baniani  katika kata ya Unga ltd,vilivyotolewa msaada na kituo cha Radio cha mambo jambo (MJ FM) cha jijini hapa.

Mkuu wa kituo cha polisi mjini kati( OCS),Philpo Mzirai alisema hayo muda mfupi baada ya kupokea sare hizo,na kuongeza kuwa jamii inapaswa kujitoa kwa kila hali kwa kutambua  umuhimu na mchango unaotolewa na  vikundi vya polisi jamii katika suala la  kukabiliana na uhalifu  ndani ya jamii.

Aidha aliwataka wananchi waliopo katika maeneo mengine jijini hapa kushiriki vema katika suala zima la ulinzi shirikishi kwa kuunda vikundi kama hicho,kwani vikundi kama hivyo maeneo mengi vimeleta manufaa kwa kupunguza uhalifu kwa kiwango kikubwa.

Alitoa ushauri kwa vikundi hivyo kuepuka kujichukulia sheria mkononi ikiwemo kutumia nguvu kubwa  ,kuwabambikia watu kesi kwa chuki binafsi ,kushiriki vitendo vya uhalifu na kuwataka kutoa taarifa kwa jeshi la polisi pindi wanapoona vitendo vya uhalifu kwenye maeneo yao .

Kwa upande wa mkurugenzi wa MJ Radio, Kervin Mbogo alisema kuwa amefarijika kwa kikundi hicho cha polisi jamii,kujitolea kwa kuweka ulinzi shirikishi katika mtaa huo, hivyo ameona umuhimu wa kukifadhili kwa kutoa msaada huo wenye thamini ya shilingi 700,000 na kuzitaka taasisi,makapuni na watu binafsi kuona umuhimu wa kutoa mchango wao kwa vikundi kama hivyo.

Aidha alisema kuwa mchango wake hauta ishia hapo ila anajipanga zaidi katika awamu nyingine aweze kukabidhi msaada mwingine wa vitendea kazi ikiwemo silaha za moto kwa ajili ya kukabiliana na ujambazi.

Katika hatua nyingine jeshi la polisi mkoani hapa,kupitia dawati lake la jinsia na ukatili limewataka wakazi wa maeneo mbalimbali jijini hapa,kutokaa kimya pindi wanapoona ama kufanyiwa vitendo vya ukatili wa aina yoyote.

Mkuu wa dawati hilo,inspekta bi Mary Mmari alivitaka vikundi vya ulinzi shirikishi kusaidia kufichua vitendo vya ukatili wa kinsia unaofanyika majumbani bila kutolewa taarifa na badala yake humalizika kimya kimya huku mwathirika akiendelea kuumia na kuathirika kisaikolojia bila kupatiwa msaada wowote.

Alisema aliwataja wanawake  kuwa  ndio wanaongoza kwa vitendo vya ukatili na kudai kuwa kesi nyingi anazokumbana nazo ofisini kwake zinawalenga wanawake zaidi kwa kuwanyanyasa watoto wao ama wakambo ,wafanyakazi wa ndani,waume zao na hata wakwe zao.

Share this: