CHADEMA WAMSHUKIA SENDEKA JIMBONI KWAKE, WAVUNA WANACHAMA 1,200

Lema akipokea kadi za wanachama wapya simanjiro

 

CHAMA cha Demokrasia na Maendeleo (CHADEMA) kimeendelea na operesheni yake ya “Vua Gamba Vaa Gwanda”  ambapo juzi walifanikiwa kuvuna zaidi ya wanachama 1,200 wa Chama Cha Mapinduzi (CCM) kutoka maeneo mbalimbali ya  wilaya ya Simanjiro.

Operesheni hiyo iliyoendeshwa kwa kutumia usafiri wa helkopta (chopa) na magari iliongozwa na mjumbe wa kamati kuu ya chama hicho, Godbless Lema akishirikiana na aliyekuwa mwenyekiti wa UV CCM mkoani Arusha, James Olle Millya ambaye ni mwenyeji wa Simanjiro mwenye ushawishi mkubwa kwa watu wa wilaya hiyo.

 

Wanaccm hao walirudisha kadi pamoja na sare mbalimbali za chama hicho zikiwemo  flana zilizokuwa na picha ya mwenyekiti wao wa Taifa, Rais  Jakaya Kikweta, bendera na vitambaa vya kichwa kwenye maeneo ya Narekauo, Lolbosiret, Naberera, Ndovu, Orkesument na Marerani ilikofanyika mikutano hiyo iliyohudhuriwa na umati mkubwa wa watu.

Akizungumza kwenye mikutano hiyo Lema aliwataka wananchi kushiriki kikamilifu kutoa maoni yao kwenye Tume ya Katiba pindi itakapopita kwenye maeneo hayo ili kuhakikisha kero zao zinapatiwa ufumbuzi kupitia katiba mpya ikiwemo kuhakikisha utitiri wa viongozi wasio na majukumu kwenye mfumo wa serikali unaondolewa ikiwemo nafasi za wakuu wa wilaya na mikoa ambao wanalipwa fedha nyingi huku wakiwa hawana kazi wanayofanya zaidi ya kupeleka maneno “umbea” kwa viongozi wa juu.

 

Aidha alilitaka jeshi la polisi kumuhoji Waziri Mkuu, Mizengo Pinda kuhusiana na sakata la kutekwa Dk. Steven Ulimboka kwa kile alichodai kuwa kunauwezekano akawa anawajua watekaji hasa kutokana na kauli aliyoitoa bungeni siku moja kabla ya kiongozi huyo wa madaktari nchini kutekwa na kuumizwa vibaya aliyosema kuwa liwalo na liwe.

Lema alisema kuwa jeshi la polisi linatakiwa kufanya kazi kwa weledi likizingatia sheria hasa katika tukio hilo linalogusa hisia za wengi na wapenda demokrasia kwani hakuna aliye juu ya sheria hivyo waziri mkuu ahojiwe ili kuweza kubaini kilichokuwa nyuma ya kauli yake hiyo.

Alisema kuwa ni vema mfumo wa kupata mawaziri ukabadilishwa kwa watu kuandika barua za maombi badala ya sasa ambapo viongozi hao hupatikana kwa kuteuliwa na rais miongoni mwa wabunge jambo linalopekea utandaji wa serikali kuwa duni huku wananchi wakisidi kusongwa na kero mbalimbali bila kupatiwa utatuzi.

Lema ambaye alikuwa mbunge wa Arusha Mjini kabla ya mahakama kumvua mapema mwezi aprili mwaka huu, alishauri ni vema mfumo wa kuwapata majaji nao ukaboreshwa kwa kuwepo na chombo cha kuwateua tofauti na sasa ambapo huteuliwa na Rais wan chi jambo linalowafanya viongozi hao wa muhimili wa kutoa haki kutokuwa huru.

Lema alitumia fursa hiyo kumshambulia mbunge wa jimbo hilo, Christopher OleSendeka, (CCM), kuwa ni mtu asiye na msimamo huku akimfananisha na tunda la tikiti maji ambalo nje ni kijani ndani ni jekundu kwa madai kuwa mbunge huyo ni ndumila kuwili kwani mchana mbunge huyo ni CCM lakini usiku hugeuka kuwa Chadema.

Alisema kuwa tabia hiyo ndiyo inayomfanya mbunge huyo wa Simanjiro kushindwa kutetea maslahi ya wananchi wake ambao wengi wanaishi kwenye lindi kubwa la umaskini ikiwemo kukosa huduma muhimu za barabara, zahanati, elimu, afya na maji safi wakati jimbo hilo linahazina kubwa ya utajiri ikiwemo machimbo ya madini yenye thamani kubwa ulimwenguni ya Tanzanite.

“Asubuhi nimefanya mkutano kwenye kijiji cha Ndovu, nikaona wananiletea chupa ya maji mwanzo nilidhani wananipa dawa lakini nilisikitika wananchi wale waliponiambia maji hayo ndiyo wanayoyatumia kwa ajili ya kunywa toka kwenye kisima wanachochangia na mifugo, hii ni hatari sana kwa afya zao, ninawasiliana na wabunge wa Chadema ili wayapeleke bungeni, hivi kwenye maisha haya yanawastahili wananchi wanaoishi kwenye utajiri mkubwa wa Tanzanite?” alihoji Lema.

Kwa upande wake Millya aliwataka wananchi wa Simanjiro kuungana naye kwa kuhamia Chadema ili waunganishe nguvu katika harakati ya kudai haki zao ikiwemo kupigania  kunufaika na madini ya Tanzanite yanayopatikana ndani ya wilaya hiyo kwani CCM kwa miaka 50 imekuwa ikitoa ahadi nyingi za neema kwa wananchi hao lakini hawazitekelezi.

Aliwataka wasitishike na vitisho wanavyotolewa na baadhi ya viongozi wa CCM kwenye eneo hilo ambao wananchi walimweleza kuwa siku moja kabla ya mkutano huo walipita kwenye kila boma(familia) wakiwataka wananchi wasijitokeze kwenye mkutano huo lakini wananchi wakawapuuza na kujitokeza kwa wingi.

Aliwataka wananchi hao kuwapuuza wale wote wanaojaribu kuwagawa kwa kigezo cha wenyeji na wakuja kwa kile alichodai kuwa lengo la watu hao siyo zuri kwani Watanzania wanahaki ya kuishi kwenye eneo lolote hapa nchini  hivyo waendelee kushirikiana katika kujiletea maendeleo na  kupigania haki zao kwa pamoja.

Millya alisema kuwa inasikitisha kuona kuwa wakati Taifa likifikisha miaka 50 ya uhuru lakini mpaka sasa wananchi wa jamii ya kimaasai bado wananyanyaswa na kuwa kama ombaomba wa ardhi kutokana na kutopewa ardhi ya kutosha kwa ajili ya shughuli zao za ufugaji na makazi.

Viongozi wengine walihutubia kwenye mikutano hiyo ni pamoja na aliyekuwa diwani wa Sombetini kwa tiketi ya CCM ambaye hivi karibuni alihamia Chadema, Alphonce Mawazo na aliyekuwa mjumbe wa mkutano mkuu wa Taifa CCM na UVCCM, Ally Bananga.

 habari kwa hisani ya habari Tanzania

 

About Woinde Shizza

This is a short description in the author block about the author. You edit it by entering text in the "Biographical Info" field in the user admin panel.