HATUTAWAFUMBIA MACHO VIONGOZI WASIOKUWA WAADALIFU

MWENYEKITI wa CCM mkoa wa Arusha Onesmo Nangole amesema chama chake kimetangaza rasmi vita kali dhidi ya watendaji wa serikali wakiwemo wakurugenzi wa halmashauri,wakuu wa wilaya na wakuu wa mikoa watakaozembea kufanya kazi zao na kwamba kitawaondoa madarakani.

Nangole aliyasema hayo jana alipokua akifungua kikao cha baraza la vijana wa CCM (UVCCM) mkoa wa Arusha kilichofanyika katika hoteli ya Goldenrose jijini Arusha.

Alisema watendaji hao wa serikali kushindwa kufanya kazi zao kikamilifu ni sawa na kuwagombanisha wananchi na CCM kwakua kiliingia mkataba nao wa kuwafanyia kazi za kuwaletea maisha bora kwa miaka mitano mingine.

Alisema kamwe yeye kama mwenyekiti hawezi kukalia kimya viongozi hao wazembe kwakua siku ya mwisho watakaoulizwa sio wao bali ni viongozi wa chama waliohusika katika mkataba huo na wananchi.

Alisema haiwezekani wao kukubali kuwekwa katika mazingira magumu ya utendaji wao kazi katika chama kwa uzembe wa viongozi wachache wanaoshindwa kusimamia na kutekeleza ilani ya chama chake iliyompa ridhaa ya kukalia kiti hicho.

Aliongeza kuwa katika maeneo mbalimbali viongozi hao wa serikali hasa wakurugenzi wa halmashauri na majiji wamekuwa wakitengeneza vita na kuwagombanisha viongozi wa chama na wananchi kutokana na kodi mbalimbali zilizoonekana kuwa kero na zilizoamuliwa kufutwa.

Akizungumzia wakuu wa wilaya Nangole alisema baadhi yao wamekuwa hawaonekani pindi wanapofuatwa na wananchi ofisini kwao ili kuomba msaada wa kero zao mbalimbali hali inayowakatisha tama wananchi hao na kukosa imani na serikali yao.

Alisema hali hiyo imekua ikiendelea kulea vidonda mbalimbali na kuacha makovu kwa wananchi hao na kubaki na maswali vichwani mwao bila majibu yake wakati wa kutoa majibu hayo ni wao ila wamekataa kuifanya kazi yao hiyo.

Katika kikao hicho wajumbe wa watano walichaguliwa kuunda kamati ya utekelezaji ambapo kwa wilaya ya Arusha alichaguliwa Amina Msangi,KaratuJackob Doday,wilaya ya Meru Titto Nassari,Arumeru Noel Severe na Monduli Diwani Kimey huku katika nafasi ya katibu hamasa alichaguliwa kwa mara nyingine mtoto wa mbunge wa Monduli Edward Lowassa,Fred Lowassa.

Share this: