UONGOZI WA SHULE WASUSIA MAHINDI NA MAHARAGE YA CHADEMA

 

KATIKA hali isiyo ya kawaida ,uongozi wa shule ya msingi,Mkoaranga,iliyopo wilayani humo,umesusia msaada wa mahindi na maharage yaliyotolewa na uongozi wa kijiji kwa ajili ya matumizi ya chakula kwa wanafunzi shuleni hapo kwa madai kwamba msaada huo unatoka chama cha upinzani cha chadema na unaweza kuwaletea matatizo ya kufukuzzwa kazi.

Uongozi  wa shule hiyo ukiongozwa na mwalimu mkuu,Samson  Kisetu Mbise,ulilazimika kutoweka katika mazingira tata shuleni hapo, dakika chache baada ya kupata taarifa juu ya kuwasiri kwa msafara wa mwenyekiti huyo wa kijiji cha Nkoaranga ,Zephania Mwanuo kupitia chama upinzani .

Tukio hilo lilitokea juzi majira ya saa 7.00 mchana, ambapo Mwenyekiti huyo alifika shuleni hapo  akiwa ameongozana na afisa mtendaji wake,Aurelian Shio pamoja na wajumbe mbalimbali wa serikali ya kijiji.

''Nimewasiliana na mwalimu mkuu muda si mrefu akanihakikishia atakuwepo shuleni ,lakini sasa haonekani ,hata msaidizi wake pia haonekani na mwalimu wa chakula naye hayupo na kibaya zaidi hakuna taarifa yoyote ya udhuru na simu zao hazipatikani''.alilalamika mwenyekiti huyo.

Viongozi wa shule hiyo wanaodaiwa kususia msaada huo kwa madai ya  kuhofia kutimuliwa na mwajiri wao ni pamoja na mkuu wa shule hiyo,msaidizi wake,Eliaremisa Nasary pamoja na mwalimu wa chakula,Kirwa Ndossi.

Mwanuo alisema mbali na kuleta msaada huo pia ziara hiyo ililenga kutembelea miradi mbalimbali ya shule na kujionea changamoto ambazo mwalimu mkuu wa shule hiyo alizieleza ili kuzipatia ufumbuzi wa kuzitatua.

Walimu waliokutwa shuleni hapo nao hawakuwa tayari kutoa ushirikiano wa kutambua ujio wa msafara wa mwenyekiti huyo,hatua iliyolazimu mwenyekiti huyo na msafara wake kukaa na magunia hayo yaliyokuwa kwenye gari kwa zaidi ya masaa matatu wasijue la kufanya .

Baadhi ya wajumbe wa kamati ya shule akiwemo mwenyekiti wa shule,Robert Kishiri  walilaani tukio la kutoweka kwa uongozi wa shule bila taarifa yoyote na kueleza kuwa kitendo hicho si cha kiungwana kwakuwa msaada huo haukuwa na chembe yoyote ya kisiasa.

Ilipotimu majira ya saa 9 alasiri mwenyekiti wa shule hiyo alimwendea mmoja ya walimu katika shule hiyo waliokuwa wamejifungia ofisini na kumsihi apokee chakula hicho kwa niaba ya mwalimu mkuu ili kuondoa hiyo aibu.

Mwalimu,Anna John Mbise alikubali kupokea msaada huo kwa shingo upande,magunia 11 ya maharage , mahindi gunia 42 na fedha tasilimu shilingi milioni 1.54 kwa ajili ya malipo ya mpishi,mafuta, kuni na mkaa.

Uchunguzi umebaini kuwa uongozi wa shule hiyo umejawa na hofu ya kupoteza kazi kutoka kwa waajiri wao ambao hawaungi mkono jitihada za vyama vya upinzani hali iliyolazimu walimu hao kutoweka.

Msaada huo ni nusu ya ahadi ya kutoa magunia 83 ya mahindi na maharage gunia 23 yatakayotoshe kutumika kwa mwaka mzima shuleni hapo ,hatua hiyo imepongezwa na wazazi wa watoto wanaosoma shuleni hapo kuwa ,wataepuka watoto wao kurudishwa nyumbani kwa kukosa mchango wa kununua chakula.

Share this: