ACHAGULIWA KUWA ASKOFU WA DAYOSISI YA MBULU

Wajumbe wa Mkutano Mkuu wa Dayosisi ya Mbulu, Sinodi ya 41 ya Kanisa la Kiinjili la Kilutheri Tanzania (KKKT), umemchagua Mchungaji Nicolaus Nsanganzelu (58) kuwa Askofu mteule wa Dayosisi hiyo.

 

Mchungaji Nsanganzelu aliyechaguliwa juzi mji mdogo wa Haydom wilaya Mbulu, anashikilia nafasi hiyo baada ya aliyekuwa askofu wa Dayosisi hiyo, Zebedayo Daudi (60) kustaafu uongozi wake.

 

Akitangaza matokeo ya uchaguzi huo uliowashirikisha wajumbe 141 Askofu wa dayosisi ya Pare, Charles Mjema alisema Mchungaji Nsanganzelu amefanikiwa kuwa Askofu baada ya kupata asilimia 97.9 ya kura zote.

 

Akizungumza baada ya kutangazwa matokeo hayo Askofu mteule huyo alisema anamshukuru Mungu kwa kumpa nguvu ya kukubali nafasi hiyo kwani awali aliona amepewa jukumu kubwa lililo juu ya uwezo wake.

 

“Hata kwenye upigaji kura nilijipigia kura ya hapana na nawashukuru wenzangu wengine wawili walioniunga mkono kwa kupiga kura ya hapana japokuwa Mungu amependa nishikilie nafasi hii,” alisema Askofu Nsanganzelu.

 

Naye, Mkuu wa Jimbo la Haydom na Mchungaji kiongozi wa Kanisa la Haydom, John Nade alichaguliwa kuwa Askofu msaidizi wa Dayosisi ya Mbulu Sinodi ya 41 kwa kupata kura zote 141 za wajumbe wa mkutano huo.

 

Mchungaji Nade alisema aliombwa agombee nafasi hiyo ila yeye binafsi hakupenda, siyo kwa maringo au ujivuni wa kibinadamu ila aliona ni majukumu makubwa ambayo asingestahimili kuyatekeleza.

 

“Hata hivyo niliona nakuwa sawa na Yona ambaye aliikimbia kazi ya Mungu na kumezwa na samaki na mimi kwa moyo mkunjufu kabisa tushirikiane wote tukimtanguliza Mungu tutaweza kumtumika,” alisema Mchungaji Nade.

Share this: