MKAGUZI WA NDANI ATAKIWA AAGIZWA KUKAGUA SHULE

BARAZA la Madiwani wa Halmashauri ya Wilaya ya Simanjiro Mkoani Manyara limemuagiza mkaguzi wa ndani akakague ujenzi wa shule ya sekondari Songambele kata ya Mirerani kutokana na mahesabu ya ujenzi wake kutowaridhisha.

Akisoma azimio ambalo liliungwa mkono na madiwani hao,Mwenyekiti wa kamati ya  Elimu,Afya na Maji,Sumleck Ole Sendeka alisema mkaguzi huyo aende akakague shule hiyo kwani halmashauri hiyo imewekeza fedha nyingi.

“Hatuwezi kukubali fedha za wananchi zipotee hivi hivi kwani wilaya ilitoa fedha na mabati kwa ajili ya ujenzi wa shule hiyo ya sekondari Songambele ambayo inategemea kupokea wanafunzi mwakani,” alisema Sumleck.

Hali hiyo ilijitokeza baada ya Ofisa mtendaji wa kata hiyo,Stephen Wenga kusoma taarifa na kudai kuwa shule hiyo imefikia kwenye mtambaa panya na hajakabidhiwa mahesabu na aliyekuwa mtendaji wa kata hiyo,Valentine Tesha.

Hata hivyo,Sumleck na Baraza hilo lilimpongeza diwani wa kata ya Mirerani,Justin Nyari kutokana na kitendo cha kutumia fedha zake na kujenga madarasa mawili ya shule ya msingi Tanzanite iliyopo mtaa wa Songambele.

Naye,Ofisa mtendaji wa kata ya Endiamtu,Edmund Tibiita alisema kata hiyo imetekeleza miradi tisa ya maendeleo ikiwemo ujenzi wa madarasa ya shule ya Endiamtu,wodi ya kina mama,kusambaza maji na ujenzi wa barabara.

Tibiita alisema kuwa diwani wa kata hiyo,Lucas Zacharia alijitolea fedha zake binafsi sh4 milioni kwa ajili ya ujenzi wa madarasa ya shule ya msingi Jitegemee,jambo ambalo lilipongezwa na Baraza hilo la madiwani.

Kwa upande wake,Ofisa mtendaji wa kata ya Orkesumet,Shaaban Mkopi alitaja baadhi ya miradi iliyotekelezwa ni  pamoja na ukarabati wa majengo ya sekondari,zahanati na mradi wa uchomeaji orkesumet.

Mkopi alitaja baadhi ya miradi mingine kuwa ni ununuzi wa wa vifaa vya maabara ya Veta-Center,ukarabati wa mtandao wa maji vitongoji vya Jitegemee na madukani pamoja na uendelezaji wa nyumba za walimu. 

Share this: