MAMLAKA YA MAPATO ARUSHA YAMWAGA MISAADA KWA YATIMA

MAMLAKA ya mapato(TRA) mkoani Arusha imejitolea misaada mbalimbali yenye thamani ya zaidi ya sh,6 milioni kwa vituo mbalimbali vya yatima vilivyopo jijini Arusha kama hatua ya kusheherekea siku la mlipa kodi nchini inayotimiza kilele chake leo.

Misaada hiyo iliyoendana na fedha taslimu ilikabidhiwa na kaimu meneja wa mamlaka hiyo mkoani Arusha,Theresia Mponeja katika vituo vya The Chiristian Women  ,Faraja Orphan sanjari na kituo cha Kibowa Orphanage kilichopo Lemara jijini hapa.

Akikabidhi misaada hiyo juzi,Mponeja alisema kwamba lengo la kutoa misaada hiyo ni baada ya mamlaka yao kuguswa na tatizo la watoto yatima hapa nchini hususani katika kipindi hiki cha maadhimisho ya siku ya mlipa kodi.

Alisema kwamba wao wamekuwa wakikusanya kodi mbalimbali hapa nchini na hivyo wameamua kurudisha faida yao mbele ya jamii hiyo ikiwa ni pamoja na kusaidia watoto yatima.

Mponeja aliitaja misaada mbalimbali waliyoitoa kuwa ni pamoja na sukari,vyandarua,mashuka,vifaa vya mashuleni,mchele,sabuni,unga,viatu,nguo za watoto pamoja na magodoro kwa ajili ya vituo hivyo.

Naye mkuu wa kituo cha The Christian Women,Zakia Khatibu pamoja na katibu wa kituo cha Faraja,Faraja Ngugi waliushukuru uongozi wa mamlaka hiyo kwa kuwajali kwa kuwakumbuka huku wakiwataka wahisani mbalimbali kuiga mfano huo.

Naye,mtoto Bahati Sungura anayelelewa katika kituo cha Faraja Orphan ambaye anasoma katika shule ya sekondari ya Kimandolu aliishukuru mamlaka hiyo kwa kumsaidia ada ya shule kiasi cha sh,300,000 huku akidai kwamba alikaa ndani ya kituo hicho kwa muda wa wiki mbili na kushindwa kuhudhuria masomo kwa kukosa ada.

Akipokea ada hiyo,katibu wa kituo hicho,Faraja aliuambia uongozi wa mamlaka hiyo kwamba ni jambo jema kumkwamua mwanafunzi huyo na kusisitiza kwamba ataziwasilisha fedha hizo mbele ya uongozi wa shule na kisha kuwapatia risiti ya malipo kama ushahidi mzuri.

Share this: