ICC YAOMBA KUUNGWA MKONO KUWAKAMATA WATUHUMIWA,RWANDA YASEMA WATUHUMIWA 50,000 BADO WAKO MAFICHONI

Wakati Rais wa Mahakama ya Kimataifa ya Makosa ya Jinai (ICC) ametoa wito kwa nchi mbalimbali, mashirika ya kimataifa na Umoja wa Mataifa kuiunga mkono mahakama hiyo kwa kusaidia kuwatia mbaroni watuhumiwa, Rwanda kwa upande wake inadai bado inawasaka watuhumiwa 50,000 wa mauaji ya kimbari ya mwaka 1994.

ICC

Aomba kuungwa mkono kuwatia mbaroni watuhumiwa: Rais Mahakama ya Kimataifa ya Makosa ya Jinai (ICC), Jaji Sang-Hyun Song Alhamisi ametoa wito kwa nchi mbalimbali, mashirika ya kimataifa na Umoja wa Mataifa, kuiunga mkono mahakama hiyo kwa kusaidia kuwatia mbaroni watuhumiwa ambao bado wanaosakwa na mahakama yake. Alikuwa anawasilisha ripoti ya Mahakama hiyo mjini New York, mbele ya Baraza Kuu la Umoja wa Mataifa katika maazimisho ya miaka 10 tangu kuanzishwa kwake. Alitoa mfano wa hati ya kukamatwa kwa Kiongozi wa waasi wa LRA nchini Uganda, Joseph Kony na wenzake watatu ambao bado hawajatiwa mbaroni tangu 2005. Alisema ni vigumu kwa mahakama hiyo kufanikiwa kuwanasa watu hao bila kuungwa mkono na mataiafa mbalimbali.

Ataka mahakama imtoe Gbagbo kizuizini: Wakili wa Utetezi wa Rais wa zamani wa Ivory Coast, Laurent Gbagbo Jumanne aliiomba Mahakama ya Kimataifa ya Makosa ya Jinai (ICC) imtoa kizuzini kiongozi huyo akidai kwamba mteja wake ni mgonjwa na ana hali mbaya ya kiafya kiasi kwamba hawezi kutoroka. Wakili huyo aliieleza mahakama kwamba mteja wake hana fedha na kutokana na kuugua, hawezi kutoroka. Mwendesha mashitaka kwa upande wake alionya kwamba Bgagbo ambaye sasa yuko kizuizini akisubiri hatua ya awali ya kusikilizwa kwa kesi yake,ana mtandao wa watu wengi wanaomwunga mkono na kwamba wako tayari kusababisha ghasia kumrejesha madaraka iwapo atatolewa kizuizini.

RWANDA

Rwanda yadai watuhumiwa 50,000 wa mauaji ya kimbari hawajakamatwa: Rwanda Jumatano wiki hii imedai kwamba watuhumiwa zaidi ya 50,000 wa mauaji ya kimbari ya mwaka 1994 bado hawajatiwa mbaroni.Watuhumiwa hao wamesambaa katika nchi mbalimbali za Kiafrika na Ulaya. Kwa mujibu wa ofisi ya Mwendesha Mashitaka Mkuu wa Rwanda, ni hati za kukamatwa kwa watuhumiwa 146 tu ndizo zilizokwisha tolewa na kwamba ofisi hiyo bado inashughulikia majalada ya wengine waliobaki.

WIKI IJAYO  

Bemba aendelea kuwailisha mashahidi wa utetezi: Upande wa utetezi katika kesi inayomkabili kiongozi wa zamani wa waasi wa Jamhuri ya Kidemokrasia ya Congo (DRC), Jean Pierre Bemba, Jumatatu ijayo utaendelea kuwasilisha mashahidi wake wa utetezi. Kiongozi huyo anashitakiwa kwa uhalifu dhidi ya binadamu na uhalifu wa kivita.

Share this: