DIWANI AKAMATA MAGUNIA YA MKAA

Diwani wa Kata ya Endiamtu Wilaya ya Simanjiro Mkoani Manyara Lucas Zacharia (kulia) ambaye jana alikamata gari aina ya canter lililokuwa limebeba magunia 120 ya mkaa bila kuwa na kibali,akizungumza na baadhi ya watu waliokuwa kwenye gari hilo eneo la Tilili,sehemu kubwa ya wilaya hiyo imegeuka na kuwa jangwa kutokana na ukataji miti kwa ajili ya biashara ya mkaa ambapo gunia moja linauzwa sh18,000 wilayani humo. 

 

DIWANI wa Kata ya Endiamtu Mji mdogo wa Mirerani Wilayani Simanjiro Mkoani Manyara,Lucas Zacharia amekamata gari lililokuwa limebeba zaidi ya magunia 120 ya mkaa bila ya kuwa na kibali cha kuwaruhusu kukata mkaa.

Hivi sasa wilaya hiyo imepiga marufuku ukataji miti na uchomaji mkaa kwenye wilaya hiyo ili kuinusuru na jangwa kutokana na kukithiri kwa vitendo hivyo vinavyofanywa na watu wanaodaiwa kuwa wanaishi mkoani Arusha.

Zacharia alilikamata gari hilo aina ya Canter juzi kwenye eneo la Tilili wilayani humo akiwa anaelekea kwenye vikao vya halmashauri hiyo na Ofisa mtendaji wa kata hiyo Edmund Tibiita na Ofisa mtendaji wa kata ya shambarai Anna Mlomi.   

Akizungumza wakati alipokamata gari hilo,Zacharia alisema amelazimika kukamata gari hilo kwani ukataji miti na uchomaji mkaa unachangia uharibifu wa mazingira na kusababisha jangwa wilayani humo.

“Hivi sasa hatupati mvua kutokana na ukataji miti na uchomaji wa mkaa hivyo tutasimama kidete katika kuhakikisha kuwa miti haikatwi na uchomaji mkaa hauendelezwi katika wilaya yetu,” alisema Zacharia. 

Alisema kuwekuwa na uwajibikaji mdogo katika suala zima la ulinzi na usalama wa maliasili za wilaya hiyo kwa baadhi ya watumishi kushiriki katika vitendo vya upokeaji rushwa na kuwaachia wachomaji mkaa kwenye eneo hilo.

“Hivi sasa wilaya yetu imegeuka na kuwa jangwa kutokana na kukithiri ukataji miti na uchomaji mkaa na kusababisha mvua kutonyesha na kuathiri malisho ya mifugo na shughuli za kilimo,” alisema Zacharia.

Alisema madiwani wa wilaya hiyo waliweka sheria ndogo ya kutaifisha magunia yote ya mkaa yanayokamatwa na kila gari litakalokamatwa litapigwa faini ya sh1 milioni ili kuhakikisha wanakomesha vitendo hivyo.

 

Share this: