BARAZA LA ARDHI LATISHIA KUFUTA KESI YA MADAI

HAKIMU wa  baraza la ardhi na nyumba mkoa wa Arusha,Maiko Makombe  ametishia kuifuta kesi ya muda mrefu ya madai, iliyofunguliwa mwaka 2007 na mamlaka ya kahawa ACU mkoa wa Arusha dhidi ya  raia wa Ugiriki anayeishi nchini Tanzania ,katika eneo la Usa river  mkoani Arusha,Sotiris Sotirades (87) anayemiliki eneo lenye ukubwa wa hekari  7,ambapo ACU wanadai kuwa ni mali yao.

Akizungumza mahakamani hapo, Hakimu Makombe alisema kuwa, kesi hiyo ya madai namba 209 ya mwaka 2007 ameirithi mwaka 2009,kutoka kwa hakimu mwingine aliyekuwa anaisikiliza ambaye kwa sasa amehamia jijini Dar es salaam.

Makombe alisema kuwa, kesi hiyo ambayo kwa sasa ipo katika hatua ya kusikilizwa imeshindwa kuendelea kwa wakati kutokana na upande wa mashtaka kutoa udhuru kila wanapofika mahakamani ama kutofika kabisa, hivyo endapo  hawataleta mashaidi kesi itakapotajwa tena kesi hiyo itafutwa ili haki iweze kutendeka.

Alisema kuwa,kesi hiyo imedumu kwa muda mrefu sasa na uchelewashaji huo umekuwa hauwatendei haki upande wa mdaiwa kwani wao wamekuwa wakihudhuria mahakamani hapo mara kwa mara na kesi kuendelea kupigwa tarehe,kitendo ambacho kinawapa usumbufu usio na tija .

‘’Kwa kweli kitendo hiki hakitendi haki hata kidogo mahakama zimekuwa zikilaumiwa sana kwa kuchelewesha kesi za watu ,lakini kwa hali hii utailaumu mahakama,na mimi leo nasisitiza awamu nyingine msipofika naifuta kesi hii’’alisema Makombe.

Hakimu Makombe alisema shauri hilo limekuwa la muda mrefu sana na kwamba tangu ahamie jijini Arusha ameshasikiliza kesi zaidi ya 400 za watu mbalimbali za aina hiyo na kumalizika kwa wakati na anashangazwa kwanini kesi hiyo haimaliziki.

Hata hivyo hakimu alimtaka Mwakilishi wa ACU kutoa maelezo kwanini wakili wao hafiki mahakamani hapo mara kwa mara ndipo alijitetea kuwa wakili wao Mahatane amekuwa akisumbuliwa na maradhi mbalimbali na kushindwa kufika mahakamani hapo .

Kufuatia hatua hiyo , hakimu huyo aliwataka upande wa  wadai  kuleta mashaidi siku ya kesi  hiyo oktoba 30  mwaka huu, saa tatu asubuhi  na iwapo hawatafika  siku hiyo , Hakimu Makombe ataifutilia mbali huku akiwataka  kujipanga kufungua upya kesi hiyo iwapo hawataridhika.

 Akizungumza kwa masikitiko mahakamani hapo, mgiriki huyo alimweleza Hakimu Makombe kuwa , upande wa madai wamekuwa wakifanya makusudi kuahirisha kesi hiyo ili kuvuta muda mzee huyo aweze kufa na hatimaye kesi yake ya msingi iweze kupotea.

''ndugu hakimu mimi sasa ni mzee na ni mgonjwa hawa ACU wananiombea nife wamekuwa wakifanya makusudi kutofika mahakamani ,mimi natumia gharama kubwa kuendesha kesi hii na hivi sasa sina kipato chochote,lengo lao nife nipoteze haki yangu maana mimi sina ndugu hap Tanzania naiomba mahakama iliangalie hilo''alisema  Sotirades

Alisema kuwa,pamoja na kuwa amekuwa akihudhuria mahakamani hapo kila kesi inapotajwa lakini cha ajabu hakuna lolote linaloendelea ,na kuwa kwa sasa hivi anaumwa sana hivyo anahofia  pindi atakapokufa  haki yake ya msingi inaweza  ikapotea.

Hivyo  aliiomba mahakama kuharakisha kesi hiyo ili iweze kumalizika kwa haraka kwani imedumu kwa muda mrefu na amekuwa akitumia gharama kubwa  ya uendeshaji wa kesi hiyo ikiwa ni pamoja na kuwalipa mawakili na usafiri wa kwenda na kurudi kila kesi inapotajwa.

Share this: