SENDEKAA ALONGA KUHUSIANA NA WANAOCHOMA MAKANISA

 Mbunge wa Jimbo la Simanjiro Mkoani Manyara Christopher Ole Sendeka akisalimiana na baadhi ya wanachama wa kikundi cha wafanyabiashara wa madini ya Tanzanite cha Tupendane Family cha Mji mdogo wa Mirerani ambapo jana aliongoza uzinduzi wa kikundi hicho na kupatikana sh6.2 milioni.

MBUNGE wa Jimbo la Simanjiro Mkoani Manyara,Christopher Ole Sendeka ameitaka Serikali kuwachukulia hatua kali watu wanaoharibu amani kwa kuchomba moto nyumba za ibada ili kuinusuru nchi na machafuko yanayotokea.

Ole Sendeka aliyasema hayo  wakati akizindua kikundi cha wafanyabiashara wa madini ya Tanzanite cha Tupendane Family kilichopo Mji mdogo wa Mirerani wilayani Simanjiro ambapo zaidi ya sh6.2 milioni zilipatika katika uzinduzi huo.  

Alisema Taifa linapita kwenye majaribu mazito kwani kuna wahuni wachache ambao huenda wameichoka amani au wamelewa na amani au wamekuwa makuwadi kwa kutumwa na watu wa nje ya nchi ili kuharibu amani ya Tanzania. 

Alisema kuwa Serikali inatakiwa kuonyesha umadhubuti wa kukomesha vurugu hizo ambazo zinasababishwa na wahuni wachache wenye dini na imani au wenye kuingia misikitini lakini wanachoma makanisa.

“Napenda kuitaka na kuihasa Serikali ingilie kati kwenye hili kwa kuonyesha umadhubuti wa kukomesha hali hii kwani hatuwezi kujinasibu kuwa tuna amani wakati wahuni wachache wanatia doa amani yetu, ” alisema Ole Sendeka.

Alisema Serikali ikiendelea kuonyesha ustaarabu kwenye hilo hali itabadilika na kusababisha machafuko ambayo yataleta vita hivyo watumie uwezo wao katika kuhakikisha wanachukua hatua kali ili makanisa yasiendelee kuchomwa moto.

“Muislamu anayejua maana ya uislamu hawezi kuchoma mahali pa kuabudu na Mkristo anayejua ukristo hawezi kuchoma moto sehemu ya kuabudia kwani haiwezekani muumini akachoma nyumba ya ibada,” alisema Ole Sendeka.

Alisema kuna wahuni wachache wenye dini au wanahudhuria kwenye sehemu ya ibada au wana majina ya kiislamu lakini siyo waumini hasa wa dini ya kiislamu kwani mwislamu halisi hawezi kuchoma kanisa.

“Hata kwenye msahafu pameandikwa kabisa waacheni wale na dini yao kwani mimi nina dini yangu na wao wana dini yao na hii siyo kwenye hadithi za mtume ipo kwenye msahafu kabisa kila mtu na dini yake,” alisema Ole Sendeka.

Alisema kuwa watanzania wanatakiwa kuitunza,kuithamini na kuienzi amani iliyoasisiwa na viongozi wa mwanzo wa nchi Baba wa Taifa Mwalimu Julius Kambarage Nyerere na Abeid Amani Karume.

“Serikali inapaswa ifike mahali isema basi kwa kuchukua hatua ili kukomesha hali hiyo kwani tumechoka kuchezewa na pia haiwezi kusema kuna amani wakati wahuni wachache wanaichezea amani hiyo” alisema Ole Sendeka.

Pia,akizungumzia kikundi hicho alisema kina dhamira na malengo mazuri ya maendeleo kwa kujiinua kiuchumi,zaidi ya kusaidia wagonjwa au waliofiwa na kina sura ya kitaifa kutokana na kuwa na jamii ya makabila mbalimbali hapa nchini.

"Kinachotakiwa ni ninyi kujipanga muongeze mtaji na mimi nitaweza kukutana na rafiki zangu kama kina Reginald Mengi nikawaomba waje watuunge mkono kwenye kutunisha mfuko wetu," alisema Ole Sendeka.

Naye,Katibu wa kikundi cha Tupendane Family Dickson Nakembetwa alisema kikundi chao kilianzishwa mwaka 2010 kikiwa na wanachama 30 na sasa kina wanachama 74 na wana akiba ya sh3 milioni kwenye benki ya NMB.

Nakembetwa alisema lengo la kuanzishwa kwa kikundi hicho ni kusaidiana wakati wa matatizo na hadi hivi sasa wanakikundi saba wameshasaidiwa matatizo mbalimbali waliyonayo  kwa kutumia sh1.1 milioni.

Alisema kiingilio cha kikundi ni sh20,000 ada ya mwaka ni sh2,000 na hivi sasa wana mpango wa kutanua kikundi chao kwa kuanzisha biashara na wanahitaji sh200 milioni kwa ajili ya kuanzisha miradi mbalimbali ya maendeleo.

Share this: