UMOJA WA MADEREVA SOKO KUU ARUSHA WALALAMIKIA KUTOZWA USHURU HOVYO

UMOJA wa madereva wa magari makubwa waliopo soko kuu jijini Arusha wameishutumu kampuni iliyopewa zabuni ya kukusanya ushuru jijini hapa kwamba imekuwa ikiwanyanyasa kwa kuwatoza adhabu mbalimbali kinyemela sanjari na kukamata magari yao bila sababu za msingi.

Umoja huo umeishushia lawama nzito kampuni hiyo ya Kilimanjaro Millenium Printers Ltd(KPML) kwamba baadhi ya watumishi wake wamekuwa wakiwatoza adhabu zisizoelewaka na kuutaka uongozi wa halmashauri ya jiji la Arusha kuingilia kati sakata hilo.

Akizungumza kwa niaba ya madereva wengine ,mwenyekiti wa umoja huo,Lomayani Mollel alisema kwamba baadhi ya watumishi wa kampuni hiyo wamekuwa wakiyakatia risiti za maegesho magari yao bila taarifa yoyote kinyume na sheria.

Huku akionyesha kitabu cha sheria ndogo za ushuru wa kuegesha magari cha halmashauri ya jiji la Arusha ,Mollel alisema kwamba wamekuwa wakitozwa adhabu mbalimbali kama kuegesha gari bila kulipia ushuru kiasi cha sh,50,000,gharama za kupeleka gari kwenye yadi sh,30,000 na gharama za kutunza gari hilo yadi sh,10,000 badala ya sh,50,000 iliyoanishwa kisheria.

Alitolea mfano kwamba hivi karibuni kuna gari la mwenzao lilikamtwa majira ya saa 6;00 mchana na kuachiwa saa 2.00 mchana lakini lilitozwa ushuru kwa kuliegesha gari hilo katika yadi ya kampuni hiyo kiasi cha sh,10,000 kinyume na sheria.

Hatahivyo,alibainisha kwamba wao wanahitaji kikao cha pamoja baina ya uongozi wa kampuni hiyo na halmashauri ya jiji la Arusha ili waweze kufafanuliwa sheria za ushuru kwa kuwa wamekuwa wakitozwa ushuru huo kinyume na sheria.

Aliwatupia lawama baadhi ya watumishi wa kampuni hiyo kwamba wamekuwa wakitumia lugha chafu,ubabe na vitisho wakati wakitekeleza majukumu yao huku wakienda mbali zaidi na kutaka wakala huyo atimuliwe endapo ameshindwa kutekeleza majukumu yake kisheria.

Akijibu shutumu hizo,mmoja wa wasimamizi wa kampuni hiyo,Eliufoo Munisi kwanza alikanusha vikali madai hayo huku akiwataka madereva hao kuzipitia sheria ndogo za ushuru kwa umakini badala ya kulalamika.

Naye,kaimu mkurugenzi wa halmashauri ya jiji la Arusha,Omary Mkombole alikiri kupokea malalamiko hayo huku akidai kwamba uongozi wake unafuatilia na kuyachunguza kwa kina kabla ya kuchukua hatua zinazostahili.

Share this: