MADIWANI MBULU WATAKIWA KUJIUNGA KWENYE MFUKO WA AFYA B

MADIWANI wa Halmashauri ya Wilaya ya Mbulu Mkoani Manyara wametakiwa kujiunga na mfuko wa Taifa wa Bima ya Afya ili waweze kupatiwa matibabu pindi wakiugua wao na wategemezi wao watano.

Hayo yamesemwa na Ofisa matekelezo wa mfuko huo Haji Mpeta wakati akizungumza kwenye kikao cha Baraza la madiwani wa halmashauri hiyo kilichofanyika juzi katika ukumbi wa halmashauri ya wilayani hiyo.

Mpeta alisema kuwa kwa mujibu wa sheria kila diwani nchini anapaswa kujiunga na mfuko huo wa bima ya afya ambapo atahudumiwa yeye na wategemezi wake watano wa kisheria.

 Alisema mfuko huo hutoa aina 623 ya dawa zilizosajiliwa na mamlaka ya chakula na dawa nchini na pia hugharimia dawa za magonjwa ya kansa,moyo na figo na wagojwa watakaolazwa hospitalini.

Alisema mfuko huo pia hugharamikia upasuaji mdogo,mkubwa na wakitaalamu lakini haugharamikii magonjwa ya kifua kikuu,ukoma na dawa za kufubaza virusi vya ukimwi (ARV) kwani magonjwa hayo yamepewa kipaumbele na Taifa.

“Pamoja na hayo lakini mfuko wa bima ya afya haugharamikii tendo la kuvunja sheria ikiwemo kutaka kujitoa uhai kwa kujinyonga,kunywa sumu au kujichoma kisu au kuathirika kwa kutumia dawa zilizopigwa marufuku,” alisema Mpeta.

Hata hivyo,madiwani hao walikubalina na suala la kujiunga kwenye mfuko huo kwa kuchangia japokuwa wamebakiza kipindi cha takribani miaka michache kabla ya kumaliza kipindi chao mwaka 2015.

Baadhi ya madiwani hao na kata zao kwenye mabano Valerian Gidshang (Endagikot) na Paulo Sulle (Daudi) walidai kuwa watajiunga kwenye mfuko huo kwani una manufaa makubwa na wataishawishi jamii ijiunge na mfuko huo.

Share this: