ARUHUSIWA KULETA SHAHIDI MWINGINE WA ZIADA KESI YA NGIRABATWARE

Mahakama ya Kimataifa ya Mauaji ya Kimbari ya Rwanda (ICTR) imeruhusu mwendesha mashitaka wa mahakama hiyo kwa mara ya pili kuleta ushahidi mwingine wa ziada kupinga utetezi wa kutokuwepo eneo la uhalifu katika kesi ya aliyekuwa Wazri wa Mipango wa Rwanda, Augustin Ngirabatware.

 

Wakati mwendesha mashitaka akiruhusiwa kumwita shahidi mmoja zaidi  kupingana na utetezi wa mshitakiwa, Mahakama hiyo iliyokuwa inaongozwaa na Jaji William Sekule imekataa ombi la upande wa utetezi kuleta mashahidi wake watano wa ziada kupinga ushahidi wa mwendesha mashitaka.

 

Katika uamuzi wake wa Mei 18, 2012, mahakama ilibaini kwamba ‘’ kigezo cha kufungua upya kesi ya mwendesha mashitaka kwa mashahidi wa ziada kimetimizwa na itakuwa ni kwa masilahi ya haki kumsikiliza shahidi (aliyehifadhiwa jina) PRWIII.’’

 

‘’Mahakama imeamuru kwamba shahidi huyu wa utetezi aletwe kutoa ushahidi haraka iwezekanavyo na isiwe zaidi ya Juni 6, 2012,’’ inasomeka sehemu ya uamuzi huo. Mahakama hiyo imepanga kukutana Juni 18, kwa ajili ya kupata majumuisho ya mwisho toka kwa pande mbili husika katika kesi hiyo.

 

Mahakama imeeleza kwamba ushahidi wa PRWIII, ambaye ni mwana diplomasia wa Nigeria una umuhimu katika kutoa changamoto kwenye utetezi wa mshitakiwa kwamba hakuwepo eneo la uhalifu, kati ya Aprili 23 na Mei 23, 1994. Katika kipindi hicho mshitakiwa alidai hakuwepo nchini Rwanda bali nje katika nchi mbalimbali ikiwa ni pamoja na Senegal, France, Swaziland, Togo na nyinginezo.

 

Mashahidi sita wa ziada wa mwendesha mashitaka walitoa ushahidi wao ulioanza kupokelewa tangu Machi 6, 2012 na shahidi PRWIII naye alitarajiwa kufanya hivyo pia. Lakini hadi Aprili 2, wakati mwendesha mashitaka anafunga kesi yake, shahidi huyo alishindwa kufika mahakamani kwa sababu serikali ya nchi yake ilikuwa haijatoa ruhusa kwake.

 

Ikiyatupa maombi ya utetezi ya kuita mashahidi wake wa ziada, Mahakama ilieleza katika uamuzi tofauti ambao nao ulitolewa Mei 18, kwamba hakuna hata mmoja wa mashahidi waliopendekezwa aliyefikia sifa za kuwa shahidi wa ziada.

 

‘’Lengo la kuita mashahidi wa ziada ni kutoa nafasi kwa utetezi kukana jambo jipya linalotokana moja kwa moja na ushahidi uliotolewa na mashahidi wa ziada wa mwendesha mashitaka, na kama jambo hilo jipya ni muhimu katika kesi husika na ambalo pia lingeweza kutarajiwa na upande wa utetezi,’’ mahakama ilifafanua.

 

Hivi sasa Mahakama hiyo pamoja na pande mbili katika kesi hiyo za mwendesha mashitaka na utetezi zipo nchini Rwanda kutembelea maeneo kunakosadikiwa kuwa uhaliofu ulitendeka.  Maeneo hayo ni pamoja na mjini Kigali na maeneo yanayozunguka, Gitarama (Rwanda kati) na Gisenyi (Kaskazini Magaribi).

 

Waziri huyo wa zamani anashitakiwa kwa kula njama za kufanya mauaji ya kimbari, mauaji ya kimbari au kushiriki mauaji hayo, uchochezi, kuteketeza kizazi na ubakaji kama uhalifu dhidi ya binadamu.

Share this: