MBUNGE WA BABATI VIJIJINI AWAOKOA WANAFUNZI

Mbunge wa Jimbo la Babati Vijijini Mkoani Manyara,Vrajilal JituSon
akizindua mradi wa maji ya kisima kwenye shule ya sekondari
Magara,kilichojengwa kwa hisani ya Mkurugenzi wa Rift Wall Jiwa
Sisodya,kwa thamani ya sh6 milioni,nyuma yake ni mkuu wa shule hiyo
Silvester Umbayda.

WANAFUNZI wa shule ya Sekondari Magara Wilaya ya Babati Mkoani Manyara ambao tangu mwaka 2007 walikuwa wanakabiliwa na tatizo la maji ya kunywa na kutumia hatimaye wamepatiwa ufumbuzi baada ya kuchimbiwa kisima.

 

Akizindua kisima hicho kilichojengwa kwa msaada wa Mkurugenzi wa Rift Wall,Jiwa Sisodiya,Mbunge wa Jimbo la Babati vijijini Vrajilal JituSon alimshukuru Sisodiya kwa msaada huo na kuwasihi walimu na wanafunzi kutunza mradi huo.

 

JituSon aliitaka jamii ya eneo hilo kuishi vizuri na wawekezaji ili waweze kusaidiana kusukuma gurudumu la maendeleo kwani Tarafa ya Mbugwe ina utajiri wa kutosha lakini jamii inakabiliwa na umasikini mkubwa.

 

“Hawa wawekezaji wetu wa bonde la Kiru wametoa misaada mingi kwa jamii hivyo inatubidi sisi kama jamii ya sehemu husika tuwape ushirikiano kwani bila ushirikiano mafanikio hayatakuwepo ,” alisema JituSon.

 

Naye,Mkuu wa shule hiyo ya Magara Silvester Umbayda alisema hadi kukamilika kwa mradi huo ulioanza kujengwa Januari 28 mwaka huu umegharimu sh6 milioni zilizotolewa na Sisodiya na familia yake.

 

Umbayda alisema shule hiyo iliyoanzishwa mwaka 2007 ilikuwa inakabiliwa na changamoto kubwa ya matumizi ya maji ya kunywa na kutumia lakini baada ya kuchimbwa kwa kisima hicho cha futi 105 tatizo hilo limekwisha.

 

Kwa upande wake,Sisodya alisema aliamua kuchimba kisima hicho baada ya kupata malalamiko ya wanafunzi wa shule hiyo kuwa wanaharisha kila mara baada ya kunywa maji ya mto Magara ambayo maji yake siyo masafi. 

 

“Mimi na familia yangu tuliamua kugharamikia kuchimba kisima hiki ili wanafunzi hawa wasipate adha ya kuugua mara kwa mara ugonjwa wa tumbo baada ya kunywa maji machafu ya mto,” alisema Sisodya.

 

Alisema zaidi ya mradi huo alishasaidia miradi mingi ikiwemo sh12 milioni za ujenzi wa barabara,alitoa vyandarua 4,000 vya kujikinga na mbu,miwani 100 ya macho ya wazee na alijitolea magunia 500 ya mahindi wakati wa njaa.  

 

Share this: