MWENDESHA MASHITAKA AOMBA KUHAMISHIA RWANDA KESI MBILI ZAIDI

Mwendesha Mashitaka wa Mahakama ya Kimataifa ya Mauaji ya Kimbari ya Rwanda (ICTR),Hassan Bubacar Jallow amewasilisha maombi mengine mawili ya kutaka kesi za watuhumiwa wawili wa mauaji ya kimbari ambao bado wanasakwa na mahakama hiyo zikasikilizwe nchini Rwanda.

Maombi yaliyowasilishwa yanawahusu Aloys Ndimbati, Meya wa zamani wa Gisovu na Charles Ryandikayo aliyekuwa meneja wa mgahawa mmoja katika wilaya ya Gishyita, zote mbili zipo katika mkoa wa Kibuye. Watu hao wanashitakiwa kwa mauaji ya kimbari, kula njama za kufanya mauaji hayo, uhalifu dhidi ya binadamu na uhalifu wa kivita kwa ushiriki wao katika mauaji ya kimbari ya 1994. 

‘’Mwendesha mashitaka aliwasilisha maombi hayo wiki iliyopita Mei 9. Tumemwomba Rais wa Mahakama kupangia majaji wa kusikiliza maombi hayo na kuyatolea uamuzi wa uhamisho,’’ Mkuu wa Kitengo cha Rufaa na Ushauri wa Kisheria katika Ofisi ya Mwendesha Mashitaka, James Arguin aliliambia Shirika la Habari la Hirondelle, Jumatatu.

Hati ya mashitaka inadai kwamba Ndimbati binafsi aliwashambulia raia wa Kitutsi na kuwapeleka wanamgambo na wachochezi wengine wa ghasia katika eneo la Bisesero ambako maelefu ya wanaume, wanawake na watoto walikuwa wanapata hifadhi kufuatia mashambulizi yaliyofanywa dhidi yao kabla, katika mkoa huo wa Kibuye.

Kwa mujibu wa hati hiyo ya mashitaka pia, Ryandikayo alishiriki katika mauaji ya maelfu ya wanaume, wanawake na watoto waliokusanyika ndani ya kanisa la Mubuga na kuwaelekeza wanamgambo na polisi kulishambulia kanisa hilo kwa risasi, mabomu ya mkono na silaha nyingine.

Maombi hayo yamekuja baada ya maamuzi ya Mahakama Mei 8, 2012 kuhamishia nchini Rwanda, kesi ya mtuhumiwa ambaye bado anatafutwa, Ladislas Ntaganzwa.

Maombi mengine matatu ya aina hiyo yameshatolewa uamuzi na ICTR ambayo yanawahusu, Mchungaji Jean Uwinkindi na watuhumiwa wawili ambao nao bado wanasakwa ikiwa ni pamoja na Fulgence Kayishema na Charles Sikubwabo.

Uamuzi mwingine bado unasubiriwa juu ya mshitakiwa Bernard Munyagishari anayesadikiwa kuwa kiongozi wa wanamgambo wa Interahamwe mkoani Gisenyi, Kaskazini ya Rwanda.

Share this: