Afisa wa zamani wa jeshi la Rwanda Luteni
Idelphonse Hategekimana ataendelea kutumikia adhabu yake ya kifungo cha maisha
jela ambapo mfanyabiashara Gaspard Kanyarukiga naye ataendela kubaki kifungoni
akitumikia adhabu ya kifungo cha miaka 30 aliyopewa na mahakama ya
awali.
Aliyekuwa na bahati ya pekee katika rufaa
yake ni Meja Aloys Ntabakuze ambaye amepunguziwa adhabu kutoka kifungo cha
maisha jela hadi miaka 35.
Ntabakuze,
ambaye alikuwa Kamanda wa Bataliani ya Makomando alitiwa hatiani kwa mauaji ya
kimbari,uhalifu dhidi ya binadamu na uhalifu wa kivita Desemba 18, 2008 kwa
sababu ya askari waliokuwa chini ya mamlaka yake kushiriki kwenye mauaji katika
maeneo mbalimbali mjini Kigali.
Naye Luteni
Hategekimana, aliyekuwa Kamanda wa kambi ndogo ya kijeshi ya Goma, mkoani
Butare, Kusini mwa Rwanda,alipatikana na hatiani Desemba 6, 2010 kwa makosa ya
mauaji ya kimbari na uhalifu dhidi ya binadamu kutokana na mchango wake katika
mauaji ya baadhi ya watu na kuamuru mauaji dhidi ya wakimbizi wa Kitutsi
waliokuwa wanapata hifadhi katika kanisa la Ngoma.
Kwa upande
wake mfanyabiashara Kanyarukiga alitiwa hatiani Novemba 1, 2010 kwa makosa ya
mauaji ya kimbari na kuteketeza kizazi kama uhalifu dhidi ya binadamu kwa
kupanga kwa kushirikiana na wengine, kubomoa kanisa lilokuwa Magharibi ya
Rwanda, Aprili 16, 1994.
Watutsi
wapatao 2000 waliokuwa wanapata hifadhi ya usalama wao katika kanisa hilo la
Nyange, wilaya ya Kivumu katika mkoa wa Kibuye, waliuawa.
Hii ni mara
ya kwanza tangu kuanzishwa kwa mahakama hii miaka 17 iliyopita Mahakama yake ya
Rufaa kutoa hukumu tatu katika siku moja.