WAWEKEZAJI KARATU WATAKIWA KUCHUKULIWA HATUA

Kutokana na uharibifu wa eneo la hifadhi ya maji ya mto Eyasi ulioko Wilayani Karatu unaofanywa na baadhi ya wawekezaji wa eneo hilo kuendelea kwa muda mrefu, Mkuu wa wilaya hiyo ametoa Amri ya wawekezaji hao kuchukuliwa hatua kali za kisheria ikiwemo kufukuzwa.

Akiongea kwenye mkutano mkuu wa hadhara na wananchi wa Tarafa ya Eyasi, mkuu wa wilaya ya Karatu Daudi Ntibenda Kijiko alitoa amri hiyo baada ya kufanya ziara ya kutembelea hifadhi ya maji ya mto huo na kukuta uharifu mkubwa uliofanya na baadhi ya wawekekezaji wa eneo.

Awali wakati wa kutembelea hifadhi hiyo wananchi wanaozunguka hifadhi walisema kuwa, wamekuwa wakionewa na watu hao na hata kutishiwa maisha pindi wakiwakataza kuharibu vyanzo hivyo vya maji hali inayahatarisha usalama wao kwa sasa na hata baadae endapo chanzo kikikauka.

Mwananchi mmoja aliyejitambulisha kama Yusuphu Abdi mkazi wa Mang’ola alisema kuwa maji ya chanzo cha mto Eyasi ndio tegemeo kubwa kwao kwa matumizi ya kawaida ya nyumbani, na kiuchumi kwa kuyatumia kumwagilia mazao yao ya kilimo hasa vitunguu ambacho kimekuwa chanzo kikubwa cha kipato chao.

Alisema kuwa kwa sasa hawana matumaini tena na maji hayo baada ya watu hao kuvamia chanzo hicho cha maji na kukata miti, kuchoma misitu, pamoja na kujenga mabanda ya kuikia wageni( kempu) pamoja na vyoo juu ya vyanzo hivyo wakati wananchi wanategemea maji hayo kwa matumizi ya nyumbani ikiwemo kunywa.

Baada ya ziara hiyo ya kutembelea hifadhi hiyo ya maji na kujionea uharibifu mkubwa uliofanywa na watu hao huku ikihatarisha usalama wa vyanzo hivyo vya maji kuendelea kuwepo ambapo alifanikiwa kuwakamata watu ambao ni baadhi ya waharibifu wa vyanzo hivyo vya maji baada ya kuhudhuria kwenye mkutano huo.

Ntibenda alisema kuwa jukumu la kutunza mazingira ni la kila mtu bila kujali mgeni au mwenyeji hivyo hivyo haiwezekani kuwavumilia baadhi wa watu wanaojifanya miungu watu kwa kujitajorisha wenyewe na kuwauwa wananchi kwa kuharibu chanzo hicho cha maji kwa manufaa yao binafsi na kuwanyima wananchi.

“Haiwezekani kuendelea kuwavumilia watu wachache wasio na utu hadi kupeleke kuvamia eneo la hifadhi ya maji na kuharibu vyanzo vya maji na kufunga bendera nyekundu kuashiria umwagaji wa damu, hii ni kupima nguvu ya serikali iko wapi hali ambayo hatutavumilia hivyo wananchi tushirikiane hata katika siku ya kuchoma makempu yaliyoko eneo hilo” alisema Ntibenda.

Baada ya kukamatwa kwa watuhumiwa hao wananchi wa Tarafa hiyo waliiomba serikali kuwachukulia watu hao hatua kali za kisheria ili kunusuru chanzo hicho kwa kutorudia kuvamia tena na kuharibu kwani mara nyingi wamekuwa wakikamatwa na kuachiliwa na mahakama ya mwanzo ya mang’ola hali iliyopoteza imani na hakimu wa mahakama hiyo.

Ziara hiyo ya mkuu wa wilaya ya Karatu pia iliwahusisha mb’unge wa jimbo la Karatu Israel Natse, wakuu wa idara mbalimbali wilaya ya Karatu pamoja na jeshi la polisi na wanahabari.

Share this: