AOMBA LUBANGA AFUNGWE MIAKA 30,MASHITAKA YA GBAGBO SASA KUSIKILIZWA AGOSTI 13

Wakati mwendesha mashitaka wa Mahakama ya Kimataifa ya Makosa ya Jinai (ICC) wiki hii ameomba mahakama hiyo imhukumu kifungo cha miaka 30 jela kiongozi wa zamani wa wanamgambo wa Jamhuri ya Kidemokrasia ya Congo (DRC), Thomas Lubanga baada ya kutiwa hatiani, usikilizaji wa uthibitisho wa mashitaka dhidi ya Rais wa zamani wa Ivory Coast, Laurent Gbagbo umeahirishwa hadi Agosti 13.

ICC

Ataka Lubanga afungwe miaka 30 jela: Alhamisi,mwendesha mashitaka wa Mahakama ya Kimataifa ya Makosa ya Jinai (ICC), Luis Moreno Ocampo aliiomba mahakama hiyo imhukumu kifungo cha miaka 30 jela kiongozi wa zamani wa wanamgambo wa Jamhuri ya Kidemokrasia ya Congo (DRC), Thomas Lubanga. Lubanga (51) alitiwa hatiani na mahakama hiyo Machi 14, mwaka huu kwa uhalifu wa kivita kwa kuwasajili watoto wa chini ya miaka 15 kupigana vita Mashariki mwa DRC.

Uthibitisho wa mashitaka dhidi ya Gbagbo waahirishwa hadi Agosti 13: Mahakama ya ICC, Jumatano iliahirisha usikilizaji wa uthibitisho wa mashitaka dhidi ya Rais wa zamani waIvory Coast, Laurent Gbagbo hadi Agosti 13. Awali usikilizaji huo ulipangwa Juni 18, lakini wakili wake aliomba muda zaidi wa kujiandaa.Gbagbo anakabiliwa na mashitaka ya uhalifu dhidi ya binadamu.

Wapingana tarehe za kuanza kusikilizwa kesi za Wakenya wanne: Wakati watuhumiwa watatu kati ya wanne katika kesi ya kuhusika katika ghasia zilizotokea nchini Kenya baada ya uchaguzi mkuu wa mwaka 2007 wanataka kesi yao ianze kusikilizwa Machi mwakani mbele ya ICC, mwenzao mmoja, Francis Muthaura, Mkuu wa zamani wa Utumishi,aliomba kesi yake ianze kusikilizwa Septemba, mwaka huu.Watuhumiwa walioomba kupitia kwa mawakili wao,kesi zao zisikilizwe Machi mwakani ni pamoja na Naibu Waziri Mkuu, Uhuru Kenyatta na Mbunge William Ruto, wote wawili wanatarajiwa kuwania nafasi ya urais katika uchaguzi mkuu ujao wa Kenya unaopangwa kufanyika mwakani.Mwingine aliyeunga mkono muda huo uliopendekezwa ni Mwandishi wa habari Joshua Sang.   

Mwendesha mashitaka mpya wa ICC aapishwa: Mwendesha Mashitaka mpya wa ICC, Fatou Bensouda, raia waGambia, anaapishwa leo (Juni 15) kuchukua nafasi ya Luis Moreno Ocampo waArgentina aliyemaliza muda wake wa kazi baada ya kutumikia mahakama hiyo kwa miaka tisa.

WIKI IJAYO  

Rwanda

Mahakama za Gacaca kufungwa rasmi: Mahakama za jadi nchiniRwanda maarufu kwa jina la Gacaca, ambazo zilitumika katika kuendesha na kuhukumu maelfu ya kesi za mauaji ya kimbari yaRwanda zitafungwa rasmi Jumatatu ijayo.

ICTR

Hukumu ya kesi ya afisa wa mwisho wa jeshi kushitakiwa ICTR Jumanne ijayo: Mahakama ya Kimataifa ya Mauaji ya Kimbari ya Rwanda (ICTR) Jumanne ijayo itatoa hukumu katika kesi inayomkabili afisa wa zamani wa jeshi laRwanda, Kapteni Idelphonse Nizeyimana.

About Woinde Shizza

This is a short description in the author block about the author. You edit it by entering text in the "Biographical Info" field in the user admin panel.