MSANII NA MCHIMBAJI AJIPIGA RISASI

Msanii maarufu na mchimbaji madini wa kampuni ya TanzaniteOne wa Mji mdogo wa Mirerani Wilaya ya Simanjiro Mkoa wa Manyara, Mosses Komba (28) amenusurika kufa kwa kujipiga risasi ya  akiwa garini.

 

Kamanda wa polisi wa mkoa wa Manyara,  Deusdedit Nsimeki alisema tukio hilo lilitokea juzi  saa 3:30 usiku Kazamoyo Kata ya Endiamtu.

 

Nsimeki alisema mchimbaji huyo wa madini ya Tanzanite alijipiga risasi ya miguu kwa kutumia bastola yake aina ya Brown ambayo baada ya kujipiga kwenye paja la kulia ilitokea  paja la kushoto.

 

"Tukio hilo la kujipiga risasi limetokea kwa bahati mbaya kwani Komba hakuiweka vizuri silaha hiyo ambayo hadi hivi sasa inashikiliwa kwenye kituo cha polisi Mirerani baada ya baba yake kuisalimisha," alisema Nsimeki.

 

Alisema bado hawajabaini chanzo halisi cha tukio hilo japo inadaiwa kuwa Komba alichomoa bastola hiyo baada ya gari lake kugongwa ubavu wa kulia na gari lingine ambalo halikutambulika mara moja.

 

Alisema Komba alikuwa barabarani eneo la Kazamoyo akiendesha gari lake aina ya Toyota Celica lenye namba za usajili T 725 CLK, akagongwa na gari lingine ndipo akataka kutoa bastola hiyo ghafla ikafyetuka na kumpiga mguuni.

 

Nsimeki alisema majeruhi huyo Komba amelazwa kwenye hospitali ya Arusha Lutherani Medical Center (ALMC) Seliani kwa ajili ya kupatiwa matibabu na hali yake inaendelea kuwa vizuri.

 

Alisema hadi hivi sasa hawajabaini gari lililogongana na gari la Komba ila wanawendelea na uchunguzi wa tukio hilo huku wakiishikilia silaha hiyo na gari lake pia lipo polisi kwa ajili ya uchunguzi.  

 

Share this: